மீனம்: 2017 ஜூன் மாத பலன்கள்

மீனம் :

மீன ராசிக்கு அதிர்ஷ்டம் கை கொடுக்கும் மாதம் இது. உங்களின் உழைப்பும் முயற்சியும் இப்போது உங்களுக்கு வெற்றியைத் தரும் என்பதால் உண்மையாக உழைத்தால் கண்டிப்பாக வெற்றிதான். அதே நேரத்தில் நீங்கள் உழைப்பிற்கு அஞ்சாதவர்கள் என்பதால் உங்களால் எதுவும் செய்ய முடியும் என்பதும் நிஜம். சொந்தத் தொழில் நல்லபடியாக நடக்கும். வியாபாரிகள் ஏற்றம் பெறுவார்கள். பண வரவு நன்றாக இருக்கும். வியாபாரம் கண்டிப்பாக குறையாது என்றாலும் அதற்காக கடுமையாக உழைக்க வேண்டியிருக்கும். வேலைக்காரர்கள் மேல் ஒரு கண் எப்போதும் இருக்கட்டும்.

கும்பம்: 2017 ஜூன் மாத பலன்கள்

கும்பம் :

எட்டில் இருக்கும் குருபகவானால் சில கும்ப ராசிக்காரர்களுக்கு மனத்திற்குப் பிடிக்காத மாற்றங்களும், பொருளாதார விஷயத்தில் ஏற்ற இறக்கங்களும், பணத் தட்டுப்பாடும் தற்போது இருக்கின்றது. ராசிநாதன் சனி அதிசார அமைப்பில் பதினொன்றில் இருப்பதால் கிடைக்கும் யோக அமைப்பைக் கொண்டு அனைத்தையும் சமாளித்து கொண்டிருக்கிறீர்கள். வருகின்ற செப்டம்பர் மாதத்தில் நடக்க இருக்கும் குருப்பெயர்ச்சிக்கு பிறகு உங்களுக்கு நிலையான தொழில் அமைப்புகளும், குறைவில்லாத பணவரவும் அமையும் என்பதால் ஜூன் மாதத்தில் அதற்கான முன்னேற்பாடுகள் நடக்கத் துவங்கும் என்பது உறுதி.

மகரம்: 2017 ஜூன் மாத பலன்கள்

மகரம் :

மகர ராசியின் யோகாதிபதிகள் புதனும், சுக்கிரனும் இந்த மாதம் தத்தம் வீடுகளில் ஆட்சி பெற்றோ அல்லது இன்னொருவரின் வீட்டில் நட்பு நிலையிலோ வலுவுடன் அமைவதால் ஜூன் மாதம் மகரத்திற்கு குறைகள் எதுவும் இல்லாத மாதமாக இருக்கும். இதுவரை வெளிநாடு போகாதவர்கள் கடல் தாண்டுவீர்கள். வடமாநிலங்களுக்குப் போவது போன்ற நீண்ட பிரயாணங்களும் இருக்கும். சொல்லிக்கொடுக்கும் பணி, சாப்ட்வேர், அச்சகம், புத்தகம், அக்கவுண்ட்ஸ், பத்திரிக்கைத்துறை போன்ற துறைகளில் இருக்கும் மகர ராசிக்காரர்களுக்கு இந்த மாதம் மேன்மைகளைத் தரும்.

தனுசு: 2017 ஜூன் மாத பலன்கள்

தனுசு :

யோகக்கிரகங்கள் குரு, சூரியன் செவ்வாய் மூவரும் ஒருவருக்கொருவர் சம்பந்தப்பட்டு செவ்வாய் ராசியையும் பார்ப்பதால் ஜூன் மாதம் எவ்வித தொல்லைகளும் இல்லாத மாதமாக தனுசு ராசிக்காரர்களுக்கு இருக்கும். இருந்தாலும் அக்டோபர் மாதம் நடக்க இருக்கும் சனிப் பெயர்ச்சிக்கு பிறகு இளைய பருவத்தினர் சனியின் தாக்கத்தை உணர்வீர்கள் என்பதால் இப்போதிருந்தே எதிலும் அகலக்கால் வைக்காமலும் அடுத்தவர்களை நம்பாமலும் தேவையற்ற கடன் விவகாரங்களில் சிக்காமலும் இருப்பது நல்லது.

விருச்சிகம்: 2017 ஜூன் மாத பலன்கள்

விருச்சிகம் :

விருச்சிக ராசிக்கு நல்லவைகள் நடக்க ஆரம்பிக்கும் மாதம் இது. ஒரு சிறப்புப் பலனாக அனுஷ நட்சத்திரக்காரர்களுக்கு நடந்து வந்த கெடுதலான அமைப்புகள் விலகி இதுவரை இருந்த துன்பங்களைத் தீர்க்கும் வழிமுறைகள் துவங்கி விட்டன. கேட்டை நட்சத்திரக்காரர்களுக்கு மட்டும் சனிபகவான் இந்த மாதம் மீண்டும் உங்கள் நட்சத்திரத்திற்கு வர இருப்பதால் மன உளைச்சல்களைத் தரக் கூடிய சம்பவங்கள் நடந்து கொண்டிருக்கின்றன.

துலாம்: 2017 ஜூன் மாத பலன்கள்

துலாம் :

மாத ஆரம்பத்தில் ராசிநாதன் சுக்கிரன் ஏழாமிடத்தில் அமர்ந்து ராசியைப் பார்க்கிறார். அதன்பிறகு எட்டாமிடத்தில் இருந்தாலும் ஆட்சி பெற்ற நிலையில் இருக்கிறார். ஜூன் மாதம் துலாம் ராசிக்கு இதுவரை தொல்லை கொடுத்துக் கொண்டிருந்த சில விஷயங்களுக்கு ஒரு நல்ல முடிவு வரும் மாதமாக இருக்கும். நீண்ட நாட்களாக வீடு கட்ட வேண்டும் அல்லது வீடு வாங்க வேண்டும் என்று நினைத்திருந்தவர்களுக்கு இப்போது வீட்டுக்கனவு நனவாகும். ஹவுசிங் லோன் போட்டு வீடு கட்டவோ வாங்கவோ செய்வீர்கள்.

கன்னி: 2017 ஜூன் மாத பலன்கள்

கன்னி :

மாதம் முழுவதும் ஒன்பதாமிடத்தில் நட்பு வலுவுடனும், பிற்பகுதியில் ஜீவன ஸ்தானத்தில் ஆட்சி வலுவுடனும் உங்கள் ராசிநாதன் புதன் இருக்கும் நல்ல மாதம் இது. மாதத்தின் பெரும்பகுதி நாட்கள் தனது நண்பரான சூரியனுடனும் புத பகவான் இணைந்திருப்பதால் கன்னி ராசிக்கு ஜூன் மாதம் கவலைகள் இல்லாத மாதமாக இருக்கும். உங்களில் ஹஸ்தம் நட்சத்திரக்காரர்களுக்கு நல்ல திருப்பமான நிகழ்வுகள் நடக்கும் மாதம் இது.

சிம்மம் : 2017 ஜூன் மாத பலன்கள்

சிம்மம் :

ராசிக்கு பத்தாமிடத்தில் ராசிநாதன் சூரியன் இருப்பதும், அவரை ஐந்துக்குடைய குருபகவான் பார்ப்பதும் இதுவரை சிம்மத்தினரின் வேலை, தொழில், வியாபாரம் போன்ற ஜீவனஅமைப்புகளில் இருந்து வந்த பின்னடைவுகளைத் விலக்கும் ஒரு அமைப்பாக இருக்கும். தொழில் விஷயங்களில் இனிமேல் உங்களுக்கு நல்லவைகள் நடக்கும். செய்யும் முயற்சிகளில் வெற்றி கிடைக்கும். இதுவரை எல்லா விஷயங்களிலும் இருந்து வந்த தடைகள் விலகும். அதிர்ஷ்டம் கை கொடுக்கும். முப்பது வயதுக்குட்பட்டவர்களுக்கு படிப்படியாக நல்ல திருப்பங்கள் இருக்கும். கவலைகள் தீரும் மாதம் இது.

கடகம்: 2017 ஜூன் மாத பலன்கள்

கடகம்:

கடகராசிக்கு கஷ்டங்கள் எதையும் கொடுக்காத மாதம் இது. தனாதிபதி சூரியன் மாத ஆரம்பத்தில் லாப ஸ்தானத்திலும், பிற்பகுதியில் விரையம் எனப்படும் செலவு ஸ்தானத்திலும் இருக்கிறார். ஒரு நிலையில் குருபார்வையிலும் இன்னொரு நிலையில் யோகாதிபதி செவ்வாயுடன் இணைந்தும் இருப்பதால் ஜூன் மாதம் நீங்கள் சூழ்நிலைகளுக்கு ஏற்ப அனுசரித்து போகும் மாதமாக இருக்கும் என்பதால் கடத்திற்கு இந்தமாதம் கெடுதல்கள் எதுவும் இல்லை.

மிதுனம்: 2017 ஜூன் மாத பலன்கள்

மிதுனம்:

ராசிநாதன் புதன் மாத முற்பகுதியில் நட்பு நிலையில் பனிரெண்டாம் வீட்டிலும், பிற்பகுதியில் ராசியிலேயே ஆட்சி நிலையில் இருக்கும் சாதகமான மாதம் இது. குறிப்பிட்டுச் சொல்ல வேண்டுமானால் மாதத்தின் முதல் பாதியில் சுபச் செலவுகளும், வீட்டிற்கு தேவையான பொருட்கள் வாங்குதலும் இருக்கும் என்பதோடு இந்தச் செலவுகளை கடன் வாங்காமல் செய்வதற்கான வருமானங்களும் உங்களுக்கு இருக்கும். மாத பிற்பகுதி முழுவதும் இதுவரை நீங்கள் எதிர்பார்க்காத இடத்தில் இருந்து உதவிகள் கிடைத்தலும், குடும்பத்துடன் பிரயாணங்கள் செய்வதும் இருக்கும்.

ரிஷபம்: 2017 ஜூன் மாத பலன்கள்

ரிஷபம்:

மாதம் முழுவதும் ராசிநாதன் சுக்கிரன் தனது வீட்டிற்குப் பனிரெண்டில் மறைந்து, தனது ஆறாம் வீட்டையே பார்க்கும் நிலையில் அமர்வதால் ரிஷப ராசிக்காரர்களுக்கு சுமாரான நன்மைகள் மட்டுமே நடக்கும் மாதமாக ஜூன் மாதம் இருக்கும். இரண்டில் செவ்வாய் அமர்ந்து. சனியும் இரண்டாமிடத்தைப் பார்ப்பதால் பணத்திற்காக பொய் பேச நேரலாம். அதனால் பணம் கிடைக்கும். யாரிடமும் சண்டை போடாதீர்கள். வாக்குவாதமும் செய்யாதீர்கள். சிறியதாக ஆரம்பிக்கும் பிரச்னை பெரியதாக மாறி நண்பர்களை விரோதியாக்கும். பேசுவதிலோ திட்டுவதிலோ கவனமாக இருங்கள். கோபத்தைக் கட்டுப்படுத்துங்கள்.

மேஷம்: 2017 ஜூன் மாத பலன்கள்

மேஷம்:

மேஷ ராசிக்காரர்களுக்கு ஜூன் மாதம் நல்ல மாதமாகவே இருக்கும் என்பதில் சந்தேகம் இல்லை. மாத ஆரம்பத்தில் ராசிக்கு ஐந்துக்குடைய சூரியன் இரண்டாமிடத்தில் அமர்ந்து ஒன்பதுக்குடைய குரு அவரைப் பார்ப்பது யோக அமைப்பு என்பதால் அஷ்டமச்சனியின் ஆதிக்கம் உங்களுக்கு கெடுபலன்கள் எதுவும் தரப்போவது இல்லை. உங்களில் சிலர் வாழ்க்கைத் துணை, நண்பர்கள், பங்குதாரர்கள் போன்ற இடங்களில் ஏமாற்றங்களையும், வேதனைகளையும் தற்போது அனுபவித்துக் கொண்டிருக்கிறீர்கள். இன்னும் சிலருக்கு எரிச்சலும், கோபமும் வரக்கூடிய சம்பவங்கள் நடந்து கொண்டிருக்கின்றன.