கன்னி - 2019 ஜனவரி மாத ராசி பலன்கள்

ஜோதிடக்கலை அரசு ஆதித்யகுருஜி

கைப்பேசி:8681 99 8888

கன்னி: 

மாதம் முழுவதும் ராசிநாதன் புதனும், யோகாதிபதி சுக்கிரனும் அதிர்ஷ்ட அமைப்புகளில் வலுவான நிலையில் இருப்பதால் கன்னி ராசிக்காரர்களுக்கு ஜனவரி மாதம் யோகம் தருவதாகவே அமையும். குறிப்பாக மாத பிற்பகுதியில் பதினொன்றாம் இடத்தில் இருக்கும் ராகுவை ராசிநாதன் புதன், அதிநட்பு நிலையில் சுபத்துவமாகி பார்ப்பதால் எதிர்பாராத இடங்களில் இருந்து லாபமும், வேலை, தொழில், வியாபாரம் போன்ற ஜீவன அமைப்புகளில் விருப்பத்திற்கேற்ப சம்பவங்கள் நடப்பதும் இருக்கும். 

மூன்றாமிடத்தில் இணைந்து பாக்கியஸ்தானத்தை பார்க்கும் இரண்டு பெரும் சுபர்களான குருவும், சுக்கிரனும் பின்னடைவுகளை தடுத்து நிறுத்தி வேலை, தொழில், வியாபாரம் போன்ற ஜீவன அமைப்புகளில் நல்ல பலன்களை தரும் என்பதால் ஜனவரி மாதம் கன்னிக்கு தொழில் விஷயங்களில் நல்லவைகளை தரும் மாதமாக இருக்கும். கடன் தொல்லைகளையும், வருமானக் குறைவையும், தொழில் சிக்கல்களையும் சந்தித்துக் கொண்டிருப்பவர்களுக்கு அது நிவர்த்திக்கப் படும். இளைஞர்களின் மனம் சந்தோஷப்படும்படியான நிகழ்ச்சிகளும், பணவரவும், உங்களால் வீட்டிற்கு புதிதாக ஏதேனும் பொருள் சேர்க்கையும் இருக்கும். திருமணம் ஆகாதவர்களுக்கு கல்யாணம் உறுதியாகும். நீண்ட நாட்களாக புத்திரபாக்கியம் இல்லாதவருக்கு கருவுறுதல் இருக்கும். 

வேலை இல்லாமல் இருக்கும் இளைஞர்களுக்கு பிடித்தமான வேலை கிடைக்கும். மாணவர்களுக்கு ஓரளவாவது படிப்பில் அக்கறை இருக்கும். கலைஞர்களுக்கு இந்த மாதம் சிறந்த மாதம் என்பதில் சந்தேகம் இல்லை. அரசு, தனியார்துறை ஊழியர்கள் வளம் பெறுவார்கள். கணவன், மனைவி உறவு அன்யோன்யத்துடன் இருக்கும். குடும்பத்தில் மகிழ்ச்சி நிலவும். சுப காரியங்களுக்கு இதுவரை இருந்து வந்த தடை விலகும். ஒரு சிலர் தங்களின் எதிர்கால வாழ்க்கைக்கு உதவக்கூடிய அடிப்படை அறிமுகமான நபர்களை சந்திப்பீர்கள். பெண்களுக்கு இது உற்சாகமான மாதம். வேலை செய்யும் இடத்தில் மதிக்கப் பெறுவீர்கள். நீண்டநாளாக தரிசிக்க நினைத்திருந்த புனிதத்தலங்களை இப்போது தரிசிக்க முடியும். மகான்களின் ஆசி கிடைக்கும். சித்தர்கள் அடங்கிய ஜீவசமாதிக்கு சென்று வர முடியும். குலதெய்வ வழிபாடு செய்வீர்கள். தந்தைவழி உறவில் நன்மைகள் உண்டு. பிள்ளைகள் உங்கள் பேச்சைக் கேட்டு நடப்பார்கள். 

3,6,8,11,12,13,18,19 ஆகிய நாட்களில் பணம் வரும். 14-ம் தேதி மதியம் 12.52 முதல் 16-ம் தேதி இரவு 8.08 வரை சந்திராஷ்டம நாட்கள் என்பதால் இந்த நாட்களில் நீண்ட தூர பயணங்களை தவிர்ப்பது நல்லது. புதிய முயற்சிகள், ஆரம்பங்கள் எதையும் மேற்கண்ட நாட்களில் செய்ய வேண்டாம்.