ஜோதிடக்கலை அரசு ஆதித்யகுருஜி
கைப்பேசி : 8681 99 8888
அசுவினி
புத்தாண்டின் முதல் மாதம் அசுவினிக்கு நல்ல மாதமாக இருக்கும். பிரச்னைகள் எதுவும் இல்லாத மாதம் இது. தொழிலில் இருந்த மந்த நிலை மாறி தொழில் நல்லபடியாக நடக்கும். நண்பர்களும், பங்குதாரர்களும் உதவிகரமாக இருப்பார்கள். தந்தையின் ஆதரவு கிடைக்கும். குடும்பத்தில் சொத்துச்சேர்க்கை, வீட்டுக்குத் தேவையான பொருட்கள் வாங்குதல் நகைகள் வாங்குதல், சேமிப்புகளில் முதலீடு செய்தல், குழந்தைகளின் எதிர்காலத்திற்கான திட்டங்கள் போன்றவைகளை இந்த மாதம் செய்ய முடியும். எடுத்த காரியம் வெற்றி பெறும்.
பரணி
உங்களில் இளைய பருவத்தினர் சிலருக்கு இந்த மாதம் காதல் அனுபவங்கள் ஏற்படும். நட்சத்திர நாதன் சுக்கிரன் வலுவாக இருப்பதால் பணவரவு நன்றாகவே இருக்கும். எதிர்பார்த்திருந்த தொகை வரும். சிரமங்கள் அனைத்தும் தீரும் மாதம் இது. உங்களுடைய மனோதைரியம் கூடுதலாகும். எத்தகைய பிரச்னைகளையும் சுலபமாக சமாளிப்பீர்கள். சிலருக்கு நீண்டதூரப் பயணங்கள் அமையும். அலுவலகங்களில் நிம்மதியான சூழல்கள் இருக்கும். மன அழுத்தம் தரும் டார்கெட் உள்ள வேலைகளை இனிமேல் செய்ய வேண்டியிருக்காது.
கிருத்திகை
இந்தமாதம் கிருத்திகை நட்சத்தினரின் தொழில், வேலை, வியாபாரம் போன்றவைகள் நன்றாக இருக்கும். எதிலும் லாபம் வரும். அனைத்திலும் வெற்றி கிடைக்கும். நீண்டநாட்களாக நினைத்திருந்த ஒரு காரியம் இந்த மாதம் உங்கள் மனம் போல் நடக்கும். கலைத்துறையினருக்கு கூடுதல் வாய்ப்புகள் கிடைக்கும். பாக்கித் தொகைகள் வசூலாகும். குறிப்பிட்ட சிலருக்கு தூரப் பயணங்கள் ஏற்படும் பிள்ளைகளுக்கு சுபகாரிய அமைப்புகள் உண்டாகும். வெகுநாட்கள் திருமணம் தாமதமான பெண் குழந்தைகளுக்கு திருமணம் உறுதியாகும்.
ரோஹிணி
சொந்தத்தொழில் செய்பவர்கள் தங்களுடைய தொழில் விரிவாக்கத்தினை கவனமுடன் செயல்படுத்துவது நல்லது. வேலைக்காரர்கள் திருடுவது போன்ற சம்பவங்கள் நடைபெறும். இந்த மாத கிரக நிலைகள் உங்களை கோபக்காரனாக்கி அதன் மூலம் ஏதாவது சிக்கலை உண்டாக்கும் என்பதால் அனைத்திலும் பக்குவமாக நடந்து கொள்வது நல்லது. இளைய பருவத்தினருக்கு இதுவரை வேலை விஷயங்களில் இருந்து வந்த இடையூறுகள் நீங்கும். இதுவரை மனதை போட்டு அழுத்திக் கொண்டிருந்த சில விஷயங்கள் தெளிவாக ஆரம்பிக்கும்.
மிருகசீரிடம்
இந்த மாதம் மிருகசீரிடத்தினர் துடிப்புடன் செயலாற்றி வெற்றிக் கம்பத்தை தொடுவீர்கள். சிலருக்கு சுபகாரியச் செலவுகள் இருக்கும். கேட்கும் இடங்களில் உதவிகள் கிடைக்கும். அரசாங்க ஆதரவு உண்டு. குறிப்பிட்ட ஒரு பலனாக பெண்களால் செலவுகள் இருக்கும். எந்த பாதையில் செல்வது என தீர்மானிக்க முடியாமல் இருந்த உங்களில் சிலர் இப்போது தெளிவான பாதையை தேர்ந்தெடுப்பீர்கள். கோபத்தைக் கட்டுப்படுத்திக் கொள்வது நல்லது. கூட்டுத் தொழிலில் பங்குதாரர் உங்களுடன் இணக்கமாக இருப்பார்.
திருவாதிரை
பெண்களால் சுகமும், உல்லாச அனுபவங்களும் கிடைக்கும் மாதம் இது. நண்பர்களால் லாபம் உண்டு. எந்த ஒரு சிக்கலையும் தைரியமாக சமாளிப்பீர்கள். திருவாதிரை நட்சத்திரக்காரர்கள் எப்போதும், எதிலும் முதன்மையில் இருக்க விரும்புவீர்கள் என்பதால் இந்தமாதம் நல்லமாற்றங்கள், பதவி உயர்வு, சம்பள உயர்வு போன்றவைகள் இருக்கும். விலை உயர்ந்த பொருட்களை கவனமுடன் பாதுகாக்க வேண்டியது அவசியம். வெளிநாட்டு வேலைக்கோ அல்லது வெளிமாநிலத்தில் மேற்படிப்பு படிக்கவோ செல்ல முடியும்.
புனர்பூசம்
புனர்பூச நட்சத்திரத்தினர் இந்த மாதம் ஆன்மிக விஷயங்களில் அதிகமாக ஈடுபாடு கொள்வீர்கள். சிலருக்கு எதிர்பாராத ஆலயத் திருப்பணிகள் செய்யும் வாய்ப்பு கிடைக்கும் பத்திரிக்கை, ஊடகங்கள் போன்ற துறையில் இருப்பவருக்கு அலைச்சலும், வேலைப்பளுவும் அதிகமாக இருக்கும். உழைப்பிற்கு ஏற்ற ஊதியம் கிடைக்க சிரமங்கள் இருக்கும் என்றாலும் பணவரவு தடைபடாது. பன்னாட்டு நிறுவனங்களில் வேலை செய்வோருக்கு இந்த நேரம் மிகவும் நல்ல பலன்களைத் தரும். எனவே சுறுசுறுப்பாக காரியம் ஆற்ற வேண்டியது அவசியம்.
பூசம்
பூசத்தினர் ஈகோவை தவிர்ப்பதால் இந்த மாதம் குடும்பத்தில் பிரச்னைகள் எதுவும் வராமல் தடுக்கலாம். எந்த ஒரு விஷயத்திலும் அவசரம் வேண்டாம். பணியிடங்களில் வாக்குவாதத்தை தவிருங்கள். அரசு, தனியார்துறை ஊழியர்கள் நன்மைகளை பெறுவார்கள். வியாபாரம் தொழில் லாபத்துடன் இயங்கும். பணவரவு சிறப்பாக இருக்கும். கலைத்துறையினருக்கு நல்ல வாய்ப்புக்கள் உண்டு. வீட்டுத் தேவைக்கான பொருள் வாங்குவீர்கள். வெளிநாட்டில் இருந்து நல்ல செய்திகள் கிடைக்கும். பூசத்திற்கு நல்ல மாதம் இது.
ஆயில்யம்
ஜனவரி மாதம் ஆயில்யத்திற்கு குறைகள் எதுவும் இல்லாத மாதமாக இருக்கும். உங்களில் சிலருக்கு இருந்து வந்த சாதகமற்ற விஷயங்கள் சென்ற வருடத்தோடு முடிந்து விட்டது. இந்த மாதம் உங்கள் நட்சத்திரநாதன் புதன் சுபவலுப் பெறுவதால் நீங்கள் செய்யும் முயற்சிகள் வெற்றி பெறும். செலவுகள் செய்யும் முன்பாக ஒருமுறைக்கு இருமுறை யோசிப்பது நல்லது. கடன் விவகாரங்கள் கட்டுக்குள் இருக்கும். நீண்ட நாட்கள் உடல் நலம் இல்லாமல் இருந்தவர்கள் இப்பொழுது குணம் அடைவார்கள். குடும்பத்தில் மகிழ்ச்சி இருக்கும்.
மகம்
மகத்திற்கு யோக மாதம் இது. எதையும் சமாளிக்கும் தைரியம் இப்போது உண்டாகும். அறிவால் சாதிப்பீர்கள். இளைய பருவத்தினருக்கு முக்கியமான திருப்பு முனைகள் இருக்கும். வாழ்க்கைத்துணை விஷயங்களில் விட்டுக் கொடுத்து போங்கள். அலுவலகங்களில் தலைமைப் பொறுப்பில் இருப்பவர்கள், தந்தையின் தொழிலைச் செய்பவர்கள், மருத்துவம், ஆன்மிகம், எலக்டிரிகல் போன்ற துறைகளில் இருப்பவர்கள் நல்ல லாபம் அடைவீர்கள். சாதிக்கும் நேரம் வந்து விட்டதால் ஜனவரி மாதம் நல்ல மாதமே.
பூரம்
பூரத்திற்கு அனைத்து தடைகளும் விலகும் மாதம் இது. வேலைக்கு செல்லும் பெண்களுக்கு அதிகமாக நன்மைகள் நடைபெறும். உங்களுக்கு இது உற்சாகமான மாதம். வேலை செய்யும் இடத்தில் மதிக்கப் பெறுவீர்கள். ஆண்கள் உங்கள் பேச்சைக் கேட்பார்கள். சொந்தத் தொழிலர்களுக்கு பணவரவிற்கு தடை இருக்காது. கையைக் கடிக்கும் விஷயங்களும் இருக்காது. இளைஞர்களுக்கு மட்டும் அலைச்சல்கள் இருக்கும். கைக்கெட்டும் தூரத்தில் உணவு இருந்தாலும் எடுத்து சாப்பிடுவதற்கு நேரம் இருக்காது. இது யோக மாதம்தான்.
உத்திரம்
ஜனவரி மாதம் முதல் உங்களுக்கு நல்ல மாற்றங்கள் நடக்க இருக்கிறது. வாழ்க்கையில் உயர்ந்த நிலைக்கு நீங்கள் செல்வதற்கு அச்சாரம் போடும் மாதம் இது. எதிர்ப்புகளும், போட்டியாளர்களும் விலகுவார்கள். உதவிகள் கிடைக்கும். சகோதர சகோதரிகளின் விஷயங்களில் ஒருவருக்கொருவர் ஆதரவான நிகழ்வுகள் இருக்கும். நடுத்தரவயதில் உள்ளவர்களுக்கு இனிமேல் வேலை, தொழில், வியாபாரம் போன்ற விஷயங்களில் சிக்கல்கள் எதுவும் இருக்காது. இதுவரை இருந்து வந்த கஷ்டங்களும், நஷ்டங்களும் இனிமேல் தொடராது.
அஸ்தம்
அஸ்தத்திற்கு ஜனவரியில் வாழ்க்கைத்துணை விஷயத்தில் உரசல்கள் இருக்கும். உங்களில் சிலர் ஈகோ பார்ப்பீர்கள். இளைய பருவத்தினர் காதலிப்பவரிடம் சண்டை போட்டுக் கொள்வீர்கள். அரசுத்துறையில் பணி புரிபவர்கள் ரகசியம் காப்பது நல்லது. சொந்த வீடு இல்லாதவர்களுக்கு வீடு அமைய ஆரம்பம் இருக்கும். என்ன செலவு வந்தாலும் வருமானம் குறையாது. வியாபாரிகளுக்கு எதிர்பார்த்ததை விட லாபங்கள் இருக்கும். சொந்த தொழில் சிறக்கும். பொதுவில் இது உங்களுக்கு நல்ல மாதம்தான்.
சித்திரை
நட்சத்திர நாதன் செவ்வாய் வலுவாக இருப்பதால் உங்களில் துலாம் ராசிக்காரர்களுக்கு ஜனவரி மாதம் முழுவதும் சுப நிகழ்ச்சிகளும், நல்ல செய்திகளும், பணவரவும் இருக்கும். கன்னி ராசியில் பிறந்தவர்களுக்கு நன்மைகள் அளவாக இருக்கும் என்றாலும் வருமானம் குறையாது. மாத முற்பகுதியில் எதிர்பாராத லாபங்களும், அதிர்ஷ்டம் கை கொடுத்தலும் உண்டு. உங்களின் நல்ல உள்ளத்தை புரிந்து கொள்ளாதவர்கள் இனிமேல் புரிந்து கொள்வார்கள் என்பதால் சித்திரைக்கு திருப்பு முனையான மாதமிது.
சுவாதி
சுவாதி நட்சத்திர பெண்களுக்கு இது நல்ல மாதம். இளைஞர்களுக்கு பிடித்தமான வேலை கிடைக்கும். கலைஞர்களுக்கு இது சிறப்புகளைத் தரும். தொழில், வியாபாரம் போன்றவைகள் விறுவிறுப்புடன் நடக்கும். கடன் தொல்லைகளால் அவதிப் பட்டவர்களுக்கு பிரச்னைகள் குறையும். நண்பர்கள் உதவுவார்கள். இளைய சகோதரத்தால் செலவுகள் உண்டு. சிலருக்கு ஆன்மிக அனுபவங்களும் பயணங்களும் உண்டு. பிள்ளைகளுக்கான கடமைகளை சரியாகச் செய்ய முடியும். பிரிந்தவர்கள் ஒன்று சேர்வார்கள். சுவாதிக்கு குறைகள் இல்லை.
விசாகம்
உங்களில் துலாம் ராசியினர் சுறுசுறுப்பாக இருப்பீர்கள். பணம் வருவதற்கு சிலர் பொய் சொல்ல வேண்டி இருக்கும். வக்கீல், மார்க்கெட்டிங் துறைகளில் இருப்பவர்களுக்கு நல்ல பணவரவு உண்டு. கடன் பிரச்னைகளிலும் வழக்கு விவகாரங்களிலும் சிக்கித் தவித்து தூக்கத்தை இழந்திருந்தவர்களுக்கு இந்த மாதம் அவைகள் நல்லபடியாக ஒரு முடிவுக்கு வந்து நிம்மதியைத் தரும். வீடு கட்டுவது இடையிலேயே தடைப்பட்டவர்கள், வீட்டுக் கடன் கிடைக்காமல் இருந்தவர்கள் இனிமேல் அந்த குறை நீங்கப் பெறுவார்கள்.
அனுஷம்
அனுஷத்திற்கு புத்துணர்ச்சி தேடி வந்து ஒட்டிக் கொள்ளும் மாதமிது. இதுவரை இருந்து வந்த எதிர்மறை எண்ணங்களை கை விடுவீர்கள். சிறிதளவு முயற்சி செய்தாலே பெரிய நன்மைகளைத் தருவதற்கு பரம்பொருள் காத்துக் கொண்டிருக்கிறது என்பதால் எதிலும் தயக்கத்தை விட்டொழிக்கவும். ஜனவரி மாதம் உங்கள் மாதம். பரம்பொருளின் கருணையினால் துன்பங்கள் அனைத்தும் முடிந்து விட்டன. இனிமேல் விடாமுயற்சியுடன் எதையும் சாதிப்பீர்கள். தொல்லை கொடுத்த அனைத்துப் பிரச்னைகளும் தீரப் போகின்றன.
கேட்டை
கேட்டை நிஜமாகவே கோட்டை கட்டப் போகும் மாதம் இது. கடந்த காலங்களில் இருந்து வந்த ஒன்றுமில்லாத வெற்று நிலைமை மாறி யோக வாழ்க்கைக்கு திரும்ப ஆரம்பிப்பீர்கள். இதுவரை நடைபெறாமல், வெறும் முயற்சி அளவிலேயே இருந்து வந்த காரியங்கள் அனைத்தும் இனி நிறைவேறும். உயிர் நண்பன் என்று சொல்லிக் கொண்டவர்களையும், உறவினர்களையும் ஏற்கனவே நடந்த சம்பவங்கள் புரிய வைத்துவிட்டபடியால் இனிமேல் எடுத்து வைக்கும் ஒவ்வொரு அடியையும் கவனமாகவே வைப்பீர்கள், கேட்டைக்கு இனி கலக்கங்கள் இல்லை.
மூலம்
மூலத்திற்கு ஜனவரி மாதம் மறைமுக எதிர்ப்புகள் மற்றும் நண்பர்களாக இருப்பவர்கள் விரோதிகளாக மாறுவது போன்ற பலன்கள் நடக்கும். எதிரி என்றும் தெரிந்தும் ஒன்றும் செய்ய முடியாமல் அவருடனேயே இருக்க வேண்டிய சூழ்நிலை வரும். தொழில் விரிவாக்கம், பணம் முதலீடு செய்தல் போன்றவைகளை இப்போது செய்ய வேண்டாம். எதிலும் நிதானத்தை கடைப்பிடியுங்கள். யாரிடமும் கோபப்பட வேண்டாம். வாக்குவாதங்களைத் தவிருங்கள். பேசும்போது வார்த்தைகளில் கவனமாக இருங்கள்.
பூராடம்
ஜனவரி மாதம் தடைகளைக் கொடுத்தாலும் சமாளிக்கும் மாதமாக இருக்கும். உங்கள் நட்சத்திரத்தில் சனி இருப்பதால் மனைவி, நண்பர்கள், பங்குதாரர்கள் போன்றவர்களிடம் கருத்து வேறுபாடுகளும் மனஸ்தாபமும் இருக்கும். இளைஞர்களுக்கு எதிலும் ஒரு குழப்பத்தன்மையும் மந்தமும் உண்டு. எல்லா விஷயமும் கிணற்றில் போட்ட கல்லாக கிடக்கும். சில நேரங்களில் விரக்தியும், சோம்பலும் வரும். எல்லாம் கொஞ்ச நாட்களுக்குத்தான். பூராடத்தினர் வெற்றி பெறுவதற்கு மட்டுமே பிறந்தவர்கள் என்பதை நினைவில் கொள்ளுங்கள்.
உத்திராடம்
உங்களில் இதுவரை வேலை, தொழில் அமையாதவர்களுக்கு இனிமேல் மாதமானால் நிரந்தரமான வருமானம் வரக் கூடிய சூழல் அமையும். குடும்பத்தில் அமைதியும் மகிழ்ச்சியும் இருக்கும். தொழில் விஷயங்களில் பிரச்னைகளை சந்தித்துக் கொண்டிருப்பவர்கள் அவை நீங்கப் பெற்று நிம்மதி அடைவீர்கள். மாதம் முழுவதும் உங்களுக்கு மன தைரியத்தைத் தரும் நிகழ்வுகளே நடக்கும். ஜனவரி மாதம் உங்களுக்கு நல்ல மாதம்தான். சிக்கலுக்கு உள்ளாக்கி வந்த விஷயங்கள் முடிவுக்கு வந்து நிம்மதிக்கு வழிவகுக்கும். எதையும் சமாளிப்பீர்கள்.
திருவோணம்
நட்சத்திரநாதன் சந்திரன் மாத ஆரம்பத்தில் பலமாக இருப்பதால் ஜனவரி மாதம் உங்களுக்கு நல்ல மாதமே. குறிப்பிட்ட பலனாக சிலர் நண்பர்களிடமோ, காதலன், காதலி, வாழ்க்கைத் துணையிடமோ ஈகோ பார்த்து முறைத்துக் கொள்வீர்கள். சிலருக்கு வீடு விஷயமான கடன்கள் ஏற்படும். திருமண ஏற்பாடுகள் தள்ளிப் போயிருந்தவர்களுக்கு திருமணம் உறுதியாகும். பயணங்களும், அது சம்மந்தமான நன்மைகளும் இருக்கும். பங்குச்சந்தை ஏற்ற இறக்கங்களுடன் காணப்படும் என்பதால் கவனத்துடன் இருங்கள். கூட்டுத் தொழில் சிறப்பாக நடைபெறும்.
அவிட்டம்
உங்களில் மகர ராசி இளைய பருவத்தினர் தன்னம்பிக்கையை வளர்த்துக் கொள்ள வேண்டிய மாதம் இது. எதையும் பாசிட்டிவாக பார்க்கும் செயல்திறன் கொண்ட உங்களுக்கு யாரும் சொல்லித் தர வேண்டியிருக்காது. மனதில் தைரியம் வரும். ஜனவரியில் இளைஞர்களுக்கு வேலை சம்பந்தமாக கஷ்டங்கள் வருவதற்கு வாய்ப்பு இல்லை. மனதைத் தளர விட்டு விட வேண்டாம். இனி உங்களுக்கு நல்ல காலம்தான். தேவையில்லாமல் யாரையும் பகைத்துக் கொள்ள வேண்டாம். கூடுமானவரை எல்லோரையும் அனுசரித்து போவது நல்லது.
சதயம்
விட்டுக் கொடுத்துப் போவதன் மூலம் நீங்கள் சாதிக்கும் மாதம் இது. வேலை வாங்கித் தருகிறேன் என்று பணம் கேட்கும் ஏஜண்டுகளை நம்பி கண்டிப்பாக பணம் கொடுக்க வேண்டாம். ஏமாறுவதற்கு வாய்ப்பு இருக்கிறது. இந்த மாதம் எந்த ஒரு விஷயத்தையும் பத்து தடவை யோசித்து செய்யுங்கள். தொழில் சம்பந்தப்பட்ட சிக்கல்கள் எதிலாவது கூட இருப்பவர்கள் மாட்டி வைப்பார்கள். எதிலும் அவசரப்படாதீர்கள். சிலருக்கு ஆலயத் திருப்பணிகள் செய்யும் வாய்ப்பு கிடைக்கும். கண் பரிசோதனை செய்து கொள்ளுங்கள்.
பூரட்டாதி
உங்களில் கும்ப ராசி இளைய பருவத்தினருக்கு இந்த மாதம் முக்கியமான மாற்றங்கள் இருக்கும். மீன ராசியை சேர்ந்தவர்களுக்கு இப்போது திருமணம் தொடர்பான நல்ல விஷயங்கள் உண்டு. மாத முற்பகுதியில் தனலாபங்களும், பணவரவுகளும் இருக்கும். 15-ம் தேதிக்குப் பிறகு வருமானத்தைச் சேமிக்க முடியாமல் செலவு செய்ய வேண்டி இருக்கும். பூரட்டாதி முதல் மூன்று பாதங்களில் பிறந்தவர்கள் போட்டி பந்தயங்களில் கலந்து கொள்ள வேண்டாம். வெற்றி கிடைக்காது. நான்காம் பாதத்தில் பிறந்தவர்களுக்கு வெற்றி உண்டு.
உத்திராட்டாதி
நட்சத்திரநாதன் சனி நல்லநிலையில் இருப்பதால் உங்களில் இளைய பருவத்தினருக்கு மனம் சந்தோஷப்படும்படியான நிகழ்ச்சிகள் இருக்கும். இளைஞர்களுக்கு அதிர்ஷ்ட மாதம் இது. நல்ல தொழில் அமைப்புகள் சிலருக்கு அமையும். காதலித்துக் கொண்டிருக்கும் இளைய பருவத்தினருக்கு பெற்றோர் சம்மதத்துடன் திருமணம் கூடி வரும். சிலர் புதிதாக காதலிக்க ஆரம்பிப்பீர்கள். பெண்களுக்கு நன்மைகள் இருக்கும். குடும்பத்தில் உங்களின் பேச்சு எடுபடும். நீங்கள் சொல்வதையும் கேட்கலாமே என்று கணவர் நினைப்பார்.
ரேவதி
ஜனவரி மாத முக்கிய பலனாக ரேவதியினர் எந்தநேரமும் படபடப்பாக இருப்பீர்கள். டென்ஷன் அதிகமாக இருக்கும். எல்லா வேலைகளையும் நீங்கள் மட்டுமே இழுத்துப் போட்டுக் கொண்டு செய்ய வேண்டி இருக்குமாதலால் குழப்பமான சூழ்நிலையில் தவறான முடிவுகள் எடுக்க வாய்ப்பு இருக்கிறது. எனவே எதையும் ஒன்றுக்கு இரண்டு முறை யோசித்தும், வீட்டில் இருக்கும் அனுபவம் வாய்ந்த பெரியவர்களிடம் ஆலோசித்தும் முடிவு எடுப்பது மிகவும் நன்மையைத் தரும். வருமானத்திற்கு குறைவில்லாத மாதம் இது.
No comments :
Post a Comment