அஸ்வினிக்கு நல்ல மாற்றம் தரும் மாதம் இது. இந்த மாற்றங்கள் மூலம் நன்றாக இருக்கப் போகிறீர்கள். உங்களில் சிலருக்கு எதிலெல்லாம் பிரச்னைகள் இருந்து வந்ததோ அவை அனைத்தும் இந்த மாதம் விலகும்.. அவரவர் வயது இருப்பிடம் தகுதி திறமைக்கு ஏற்றார்போல நன்மைகள் நடக்கும். சிலருக்கு மூத்த சகோதரரால் விரையம் இருக்கும். சகோதரிக்கு சுபகாரியங்கள் நடப்பதற்கு முன்னேற்பாடுகள் உண்டு. சிலருக்கு தங்கைகளின் திருமணம் உறுதியாகும். ஆன்மிக எண்ணங்கள் கூடுதலாக இருக்கும். ஆன்மிக யாத்திரையும் உண்டு.
பரணி நட்சத்திரக்காரர்களின் பிரச்னைகள் அனைத்தும் நல்லவிதமாக முடியும் மாதம் இது. சிலருக்கு இதுவரை பார்த்து வந்த வேலையில் மாற்றம் அல்லது கம்பெனி மாற்றம் இருக்கும். குறிப்பாக எழுத்துத்துறையில் இருப்பவர்களுக்கு நல்ல மாற்றம் உண்டு. உங்களில் இளைய பருவத்தினருக்கு நினைப்பது நடக்கும் மாதம் இது. வயதிற்கே உரிய உல்லாச அனுபவங்களை பெறுவீர்கள். சிலருக்கு தோழிகளால் இனிமையான அனுபவங்கள் இருக்கும். செலவுகள் உள்ள மாதம் இது. அதற்கேற்ற வருமானமும் உண்டு. நவம்பரில் நல்லவைகளே அதிகம்.
கிருத்திகை
உங்களில் மேஷராசியில் பிறந்தவர்களுக்கு பிரச்னைகள் இல்லாத மாதம் இது. நன்மைகள் நடப்பதை உணருவீர்கள். ரிஷபராசியில் பிறந்தவர்கள் எதிலும் நிதானமாக இருக்க வேண்டும். அவர்களுக்கு வேலை தொழில் விஷயங்களில் மாற்றங்கள் இருக்கும். ரிஷபத்தில் பிறந்தவர்கள் தற்போது எவ்வித புது முயற்சிகளும் செய்யாமல் தவிர்க்க வேண்டும். ரிஷபத்தினருக்கு மாதம் முழுவதும் பரபரப்பும் டென்ஷனுமாக இருக்கும். உங்களை அறியாமலேயே எப்போதும் டென்ஷனாக இருப்பீர்கள். நவம்பர் நல்ல மாதம்தான்.
ரோகிணி
ரோகிணியினர் இந்த மாதம் சற்றுக் குழப்பமான மனநிலையில் இருப்பீர்கள். எதிலும் தெளிவான முடிவு எடுப்பதற்கு தயங்குவீர்கள். சிலருக்கு இனம் புரியாத தயக்கங்கள், மனக்கலக்கங்கள் இருக்கும். மாத இறுதியில் கிரகநிலைகள் மாறுவதால் அனைத்துப் பிரச்னைகளும் சூரியனை கண்ட பனிபோல விலகும். பத்திரிக்கைத்துறையினர், நிருபர்கள், கணக்கு மற்றும் அக்கவுண்ட் சம்பந்தப்பட்டவர்கள், கல்வி நிலையங்கள் நடத்துபவர்கள், ஏஜெண்டுகள், பச்சை நிறப் பொருட்கள் விற்பவர்கள் உள்ளிட்டவர்களுக்கு நன்மைகள் இருக்கும்.
மிருகசீரிஷம்
உங்களில் மிதுனராசியில் பிறந்தவர்களுக்கு மேன்மையான பலன்களும் ரிஷபத்தில் பிறந்தவர்களுக்கு நிதானமான பலன்களும் நடக்கும் மாதம் இது. உங்கள் செயல்களில் புத்துணர்ச்சியும், புதுமையும், விவேகமும் இருக்கும். மாதம் முழுவதும் உதவிகள் கிடைக்கும். நண்பர்கள் உதவுவார்கள். வரவுக்கு மீறிய செலவு இருக்கும். அதற்காக கடன் வாங்க மாட்டீர்கள். ஏதாவது ஒரு ரூபத்தில் பணவரவு இருக்கும். பெண்களுக்கு இது நல்ல மாதம். சகோதரிகளுக்கு உதவீர்கள். சிலர் வெளிமாநிலம், வெளிநாடு போக நேரிடும்.
திருவாதிரை
திருவாதிரையில் பிறந்தவர்களுக்கு இந்த மாதம் வேலை விஷயங்களில் நன்மைகள் உண்டு. குறிப்பாக பெண்களால் லாபம் கிடைக்கும் மாதம் இது. அலுவலகங்களிலும், குடும்பத்திலும் தடையாக இருந்த அனைத்தும் விலகி நல்ல பெயர் கிடைக்கும். அலுவலகங்களில் இருந்த முட்டல் மோதல் நீங்கும். சொந்தத் தொழில் செய்பவர்களுக்கு ஆர்டர்கள் கிடைக்கும். பொருளாதார உயர்வு இருக்கும். வியாபாரிகளுக்கு எதிர்ப்புகள் போட்டியாளர்கள் ஒழிந்து அனைத்தும் உங்கள் வசமாகும். குலதெய்வ வழிபாடு செய்வீர்கள். ஞானிகள் தரிசனம் கிடைக்கும்.
புனர்பூசம்
உங்களில் சிலருக்கு தூரப் பிரயாணங்கள் உண்டாகும். காவல்துறை, ராணுவம் போன்றவைகளில் பணிபுரிபவர்களுக்கு நல்ல விஷயங்கள் நடக்கும். சிலருக்கு அரசு வேலை பற்றிய தகவல்கள் வந்து சேரும். பிறந்த இடத்தை விட்டு தூர இடங்களில் இருப்பவர்களுக்கு சிக்கல்கள் எதுவும் இருக்காது. சிலர் மலையும் மலைசார்ந்த இடங்களுக்கு பயணம் செல்லுவீர்கள். சிலருக்கு புனிதப் பயணம் செல்லும் வாய்ப்பு கிடைக்கும். இளம் பருவத்தினருக்கு திருமண உறுதித் தகவல்கள் உண்டு. உங்கள் அனைவருக்கும் இது ஒரு திருப்புமுனையான மாதம்.
பூசம்
பூச நட்சத்திரக்காரர்களுக்கு இந்த மாதம் பணவரவிற்கு தடை எதுவும் இருக்காது. கையைக் கடிக்கும் விஷயங்களும் இருக்காது. கால்நடை மருத்துவர்கள், வளர்ப்புப் பிராணிகள் விற்பவர்கள் போன்றவர்களுக்கு நன்மைகள் இருக்கும். வீண் விரையங்கள் இருக்கும். செலவுகளை சமாளிக்க முடியாமல் திணருவீர்கள். கூட்டுத்தொழிலில் பங்குதாரர் உங்களுடன் இணக்கமாக இருப்பார். நண்பர்களால் லாபம் உண்டு. இளைஞர்களுக்கும், மாணவர்களுக்கும் எதிர்பாலினர் மீது ஈர்ப்பு ஏற்படும் காலகட்டம் நடைபெறுகிறது. காதல் விவகாரங்களில் சிக்குவீர்கள்.
ஆயில்யம்
நவம்பர் மாதம் உங்களுக்கு ஒரு குறிப்பிட்ட பலனாக அந்நிய மத, இன, மொழிக்காரர்கள் உதவுவார்கள். ஒரு இஸ்லாமிய நண்பர் உங்களின் பிரச்னைகளை தீர்ப்பார். சிலருக்கு வீடு யோகமும், பழைய வாகனங்களை மாற்றி புது வாகனம் வாங்கும் அமைப்பும் உருவாகிறது. அம்மாவால் ஆதாயங்களும், ஆதரவும் இருக்கும். சாதகமான கிரக அமைப்பால் எதையும் அறிவால் சாதிப்பீர்கள். மற்றவர்கள் பொறாமையாக பார்க்கும் அளவிற்கு ஊக்கத்துடன் செயல்படுவீர்கள். எல்லாத் துறையைச் சேர்ந்தவர்களுக்கும் நல்ல மாதம் இது.
மகம்
மாத பிற்பகுதியில் இருந்து மகத்திற்கு நல்ல பலன்கள் நடக்கும். உங்களில் சிலர் வீட்டை அழகுபடுத்துவீர்கள். எந்த வித தொல்லைகளோ கஷ்டங்களோ இனிமேல் இருக்காது. இளையபருவத்தினர் சோம்பலை விட்டு ஒழியுங்கள். அதிகாலையில் எழுந்து வீட்டை விட்டு வெளியே வந்து வேலையை பார்க்க வந்து விட்டாலே பாதி வேலை முடிந்து விட்டதாக அர்த்தம். எனவே சுறுசுறுப்பாக ஆக்டிவாக இருங்கள். கூட்டுத் தொழிலில் நன்மைகள் இருக்கும். யாரிடமும் சண்டை போடாதீர்கள். வாக்குவாதமும் செய்யாதீர்கள். மாத இறுதி கை கொடுக்கும்.
பூரம்
பூரம் நட்சத்திரத்தின் பின்னடைவுகள் விலகும் மாதம் இது. வேலை, தொழில், வியாபாரம் போன்ற ஜீவன அமைப்புகள் அனைத்திலும் இருந்த தடைகள் இந்த மாதம் விலகுகிறது. பேச்சில் மட்டும் கவனமாக இருங்கள். சிறியதாக ஆரம்பிக்கும் பிரச்னை பெரியதாக மாறி நண்பர்களை விரோதியாக்கும். பங்கு வர்த்தகம் போன்ற ஸ்பெகுலேஷன் துறைகளில் பெரிய அளவில் முதலீடு செய்ய வேண்டாம். முதலில் சிறிது வருமானம் வருவது போல தெரிந்தாலும் கடைசியில் உள்ளதும் போய் விடும். செலவு செய்வதில் கண்டிப்புடன் இருங்கள்.
உத்திரம்
உத்திரத்திற்கு நல்ல மாதம் இது. மந்தமாக இருக்கும் தொழில், வியாபாரம் போன்றவைகள் விறுவிறுப்புடன் நடக்கும். கடன் தொல்லைகளால் அவதிப் பட்டவர்களுக்கு பிரச்னைகள் குறைய ஆரம்பிக்கும். தாயார்வழியில் நல்ல விஷயங்களும், ஆதாயங்களும் வரும். நண்பர்கள் உதவுவார்கள். சிலர் நீண்டதூரப் பயணம் செய்வீர்கள். பள்ளியில் படிக்கும் பிள்ளைகளின் மேல் ஒரு கண் இருக்கட்டும். அவர்கள் யாருடன் பழகுகிறார்கள் என்பதை கண்காணியுங்கள். சிலருக்கு புதிய வீடு அல்லது வாகனம் அமையும். குறைகள் எதுவும் இல்லை.
அஸ்தம்
அஸ்தம் நட்சத்திரக்காரர்களுக்கு ஒரு சிறப்புபலனாக இந்த மாதம் தயக்கத்தையும் சோம்பலையும் ஒதுக்கி வைத்து விட்டு முன்னேற்ற முயற்சிகளை செய்பவர்களுக்கு வெற்றி நிச்சயம் உண்டு. சொந்தவீடு இல்லாதவர்களுக்கு வீடு வாங்குவது அல்லது கட்டுவதற்கான ஆரம்ப நிகழ்ச்சிகள் இருக்கும். தாயார் வழியில் நல்லவைகளும் அம்மாவின் அன்பும், அவரிடம் கேட்பது கிடைப்பதும் நடக்கும். வெளிநாடு, வெளிமாநிலம் சம்மந்தப்பட்ட விஷயங்கள் யோகம் தரும். எதிர்பார்த்த தொகை ஒன்று சிரமம் இல்லாமல் இப்போது கிடைக்கும்.
சித்திரை
நவம்பர் முழுவதும் சித்திரை நட்சத்திரக்காரர்களின் பொருளாதார நிலைமை நல்லபடியாகவே இருக்கும். செலவுகள் அதிகமாகவே இருக்கும் என்றாலும் பணவரவிற்குப் பஞ்சம் இருக்காது. தொடக்கத்தில் சிலநாட்கள் மட்டும் ஒரு தெளிவான முடிவு எடுக்கமுடியாமல் மனம் அலைபாயும் நாட்களாக அமையும். சிலருக்கு எதிர்பாராத அதிர்ஷ்டம் கிடைக்கும். பங்குச்சந்தை, சூதாட்டம் போன்ற வகைகளில் ஒரு தொகை உண்டு. அதேநேரத்தில் தொகை கிடைத்ததும் விலகி விடுவது நல்லது. கிடைத்ததை மீண்டும் முதலீடு செய்தால் நஷ்டம் வரும்.
சுவாதி
சுவாதியினர் இந்த மாதம் எதிர்ப்புகளையும் எதிரிகளையும் ஜெயிப்பீர்கள். உங்களைப் புரிந்து கொள்ள முடியாமல் நண்பர்களும் குடும்பத்தினரும் குழம்பிப் போவார்கள். வேலை, தொழில், வியாபாரம் போன்றவைகளில் இடையூறுகள் இருக்காது. நவம்பர் மாதம் உங்களுக்கு நல்ல மாதம்தான். எதையும் வெற்றியாக முடிக்க முடியும். கணவன் மனைவி உறவு நன்றாக இருக்கும். நண்பர்கள், பங்குதாரர்களுக்குள் இணக்கமான நிலை இருக்கும். பிள்ளைகளிடமிருந்து நல்ல செய்திகள் வரும். வயதானவர்களுக்கு ஆரோக்கியம் மேம்படும்.
விசாகம்
விசாகம் நட்சத்திரக்காரர்கள் மதிப்பு வாய்ந்த செயல்களைச் செய்து உறவினர்களிடமும், நண்பர்களிடமும் நற்பெயர் எடுப்பீர்கள். கோட்சார அமைப்புப்படி யோககாலம் என்பதால் தொழில் விரிவாக்கம், புதிய கிளைகள் ஆரம்பித்தல், புதிய டீலர்ஷிப் எடுத்தல், பணம் முதலீடு செய்தல் போன்ற விஷயங்கள் இப்போது கை கொடுக்கும். குறிப்பாக சகோதர, சகோதரிகளுக்கு தக்க சமயத்தில் கை கொடுத்து உதவுவீர்கள். பெண்களால் மறைமுகமான லாபங்கள் இருக்கும். சகோதர, சகோதரிகளின் திருமணம் இப்பொழுது கூடி வரும்.
அனுஷம்
இதுவரை வேலை, தொழில் விஷயங்களில் சரிவைச் சந்தித்துக் கொண்டிருந்த அனுஷம் நட்சத்திரக்காரர்கள் இவைகள் முன்னேற்றம் பெறுவதை கண்ணெதிரே காண்பீர்கள். விருச்சிகத்திற்கு இனிமேல் அனைத்து பின்னடைவுகளும் மாறி சாதகமான சூழல் அமைவதை பார்க்க முடியும். கணவன் மனைவி உறவு சந்தோஷமாக இருக்கும். விட்டுக் கொடுத்துப் போவதன் மூலம் சாதிப்பீர்கள். இனிமேல் பொருளாதார நிலை நன்றாகவே இருக்கும். பணவரவு உண்டு. உயர்கல்வி படிக்க இதுவரை இருந்து வந்த தடை நீங்கும்.
கேட்டை
கேட்டை நட்சத்திரம் முன்னேற்றப் பாதையில் அடியெடுத்து வைக்கும் மாதம் இது. இதுவரை மன அழுத்தம் தந்து வந்த நிகழ்வுகள் முடிவுக்கு வரத் துவங்கும். அலுவலகங்களில் பொறாமையால் பாதிக்கப்பட்டவர்கள் பதிலடி கொடுக்கத் தொடங்குவீர்கள். பணவரவுக்கு தடைகள் நீங்கும். எல்லா நல்லவைகளும் நிதானமாக நடக்கும். அவசரப்படாதீர்கள். இனி உங்களுக்கு கெடுபலன்கள் இல்லை. இந்தமாதம் உண்டாகும் அடிப்படை அம்சங்கள் சிலவற்றால் படிப்படியாக நல்லவைகள் நடந்து இனி பிரச்னை இல்லாத வாழ்க்கை உண்டு.
மூலம்
இந்த மாதம் மூலத்திற்கு வேலை, தொழில், வியாபாரம் போன்ற விஷயங்களில் சிக்கல்கள் எதுவும் இருக்காது. இந்த மாதம் 24 ம் தேதி முதல் சனி உங்கள் நட்சத்திரத்தில் இருந்து விலகப் போகிறார். இது இனிமேல் நல்ல பலன்களையும், பணவரவையும், பொருளாதார மேம்பாடுகளையும் தரக்கூடிய கிரக அமைப்பு. இனிமேல் உங்களுக்கு எவ்வித தொல்லைகளும் இல்லை. அதேநேரம் எதிலும் அகலக்கால் வைக்காமல் நிதானமாக இருப்பது நல்லது. இனிமேல் உங்களுக்கு ஒரு குறையும் இல்லை. எதையும் சமாளிப்பீர்கள்.
பூராடம்
பூராடத்திற்கு திருப்பங்களைக் கொடுக்கின்ற மாதம் இது. உங்களை பிடிவாதக்காரர் என்று தவறாகப் புரிந்து கொண்டவர்கள் உங்கள் நல்ல மனதைத் தெரிந்து கொண்டு அருகில் வருவார்கள். அனைத்தும் நன்மையாகும் மாதம் இது. நட்சத்திர நாதன் சுக்கிரன் நல்ல நிலையில் இருப்பதால் மாதம் முழுவதும் உதவிகள் கிடைக்கும். உங்களாலும் பிறருக்கு உதவ முடியும். கையிலும் பணம் இருக்கும். குடும்பத்தில் கருத்து வேறுபாடுகள் இருந்தாலும் பேசித் தீர்ப்பீர்கள். தூரத்தில் இருக்கும் குழந்தைகள் மூலம் நல்ல செய்திகள் உண்டு.
உத்திராடம்
உத்திராடம் நட்சத்திரக்காரர்களுக்கு நவம்பர் மாதத்தின் முற்பகுதியை விட 15-ந் தேதிக்கு சிறப்பானதாக அமையும். மாத ஆரம்பத்தில் உங்களை குழப்புவதற்கென்றே சிலர் அருகில் இருப்பார்கள். யாருடைய பேச்சையும் கேட்டு செயல்படாமல் என்றுமே நீங்கள் தனித்தன்மை உடையவர்தான் என்பதை நிரூபிக்கும் வகையில் சுயமாகவே ஒரு முக்கிய முடிவு எடுப்பீர்கள். சிலருக்கு மருத்துவச்செலவுகள் இருக்கும். பங்குச்சந்தையில் லாபம் வருவது போல் காட்டி பிறகு நஷ்டம் ஏற்படலாம் என்பதால் கவனமாக இருக்க வேண்டும்.
திருவோணம்
உங்களில் தொழில் விஷயங்களில் பிரச்னை இருப்பவர்களுக்கு சிக்கல்கள் விலகுவதற்கான அறிகுறிகள் தெரியத் துவங்கும். முதல்வாழ்க்கை கோணலாகி கஷ்டத்திற்கு ஆளானவர்கள் நல்ல இரண்டாவது வாழ்க்கையை அடைவீர்கள். வழக்கு, காவல்நிலையம் என அலைந்து கொண்டிருப்பவர்கள் சாதகமான திருப்பங்களை காண்பீர்கள். தீர்ப்பு சாதகமாக அமையும். வாழ்க்கை இனி செட்டிலாகும். கணவர் திருந்துவார். உங்களுடைய மனோ தைரியம் கூடுதலாகும். எத்தகைய பிரச்னைகளையும் சுலபமாக சமாளிப்பீர்கள். இனி எல்லாம் சுகமே.
அவிட்டம்
உங்களில் சனி தசை நடப்பவர்களுக்கு அதிக நன்மைகள் நவம்பர் மாதத்தில் இருக்கும். எப்படி வருமானம் வந்தது என்று வெளியில் சொல்ல முடியாத அளவிற்கு சிலருக்கு மறைமுகமான வழிகளில் தனலாபம் உண்டு. லயசனிங் எனப்படும் பணத்திற்காக வேலை முடித்துக் கொடுப்பவர்களுக்கு காரியங்கள் சுலபமாக முடியும். அரசாங்க ஆதரவு கிடைக்கும். அவிட்டம் நட்சத்திரக் காரர்கள் எதிலும் யோசித்து செயல்படுவீர்கள் என்பதால் உங்களின் நீண்டகால பிரச்னைகளை தற்போது வெற்றி கொள்வீர்கள். எதிர்ப்புகள் விலகும்.
சதயம்
சதயத்தில் பிறந்த இளையபருவத்தினருக்கு காதல் அனுபவங்கள் ஏற்படும் மாதம் இது. குடும்பத்தில் ஒருவருக்கொருவர் உதவிகரமாக இருப்பீர்கள். வாழ்க்கைத் துணையால் லாபம் உண்டு. சிலருக்கு மட்டும் கடன் பிரச்னைகள் கலக்கத்தை கொடுக்கும். தொல்லைகளைத் தவிர்க்க கடன் கொடுத்தவரை நேரில் சந்தித்து தவணை வாங்கி கொள்வது நல்லது. யாரிடமும் சண்டையோ வாக்குவாதமோ செய்யாதீர்கள். வி.ஐ.பி.க்கள் அறிமுகம் இந்த மாதம் உண்டு. மூத்தவர்களிடம் நல்ல பெயர் எடுப்பீர்கள். சிலர் தூரப் பயணங்கள் செய்வீர்கள்.
பூரட்டாதி
உங்களில் கும்ப ராசிக்காரர்களை சுற்றியுள்ளவர்கள் வெறுப்பேற்றும்படி நடந்து கொள்வார்கள். அதனால் கோபம் வரும். கோபத்தைக் கட்டுப்படுத்திக் கொள்வது நல்லது. கிரகநிலைகள் உங்களை கோபக்காரனாக்கி அதன்மூலம் ஏதாவது சிக்கலை உண்டாக்கும். அனைத்திலும் பக்குவமாக நடந்துக் கொள்வது நல்லது. அதேநேரம் மீனத்தினருக்கு இதுபோன்ற பிரச்னைகள் இருக்காது. அலுவலகத்தில் வேலை செய்யும் பெண்கள் அரட்டைகளில் ஈடுபட வேண்டாம். நண்பர்கள் விரோதியாவார்கள் என்பதால் பேசுவதில் கவனமாக இருங்கள்.
உத்திராட்டாதி
உத்திராட்டாதிக்கு இந்த மாதம் மனம் சந்தோஷப்படும்படியான நிகழ்ச்சிகளும், பணவரவும், புதிதாக ஏதேனும் பொருள் சேர்க்கையும் இருக்கும். திருமணம் ஆகாதவர்களுக்கு உறுதியாகும். இளையவர்களுக்கு அதிர்ஷ்டம் செய்யும் மாதம் இது. மனதில் இருந்து வந்த எதிர்மறை எண்ணங்கள், தாழ்வு மனப்பான்மைகள் இனி இருக்காது. எதை நினைத்து கலங்குகிறோம் என்று தெரியாமல் கலக்கத்தில் இருந்து வந்தவர்கள் உற்சாகம் அடைவீர்கள். உடல் நலமில்லாமல் இருந்தவர்கள் குணமடைவீர்கள். பிரச்னைகளை சுலபமாக சமாளிப்பீர்கள்.
ரேவதி
ரேவதி நட்சத்திரக்காரர்களின் மனம் உற்சாகமாக இருக்கும் மாதம் இது. வீட்டில் சுப காரியங்கள் இருக்கும். பிள்ளைகள் வழியில் நல்ல சம்பவங்களும், நிகழ்ச்சிகளும் உண்டு. வெறும் முயற்சி அளவிலேயே இருந்து வந்த காரியங்கள் அனைத்தும் இனி மனம் போல நிறைவேறும். சிலர் ஏதேனும் ஒரு சாதனைச் செயல் புரிந்து புகழடைவீர்கள். அந்நிய இன மத மொழிக்காரர்கள் உதவுவார்கள். வேலை செய்யும் இடங்களில் புகழப்படுவீர்கள். எதிர்காலம் பற்றிய நம்பிக்கை பிறக்கும். மனதிற்கு சந்தோஷமான விஷயங்கள் மட்டும் நடக்கும்.
No comments :
Post a Comment