தனுசு: 2021 டிசம்பர் மாத ராசி பலன்கள்

 

ஜோதிடக்கலை அரசு ஆதித்யகுருஜி

கைப்பேசி : +91 8286 99 8888 

தனுசு:

மாதம் முழுவதும் பாக்கிய வீட்டைப் பார்க்கும் அமைப்பில் மூன்றாமிட ராசிநாதனும், யோகாதிபதி செவ்வாய் ஆட்சி நிலையிலும் இருப்பதால் தனுசுக்கு  தொட்டது துலங்கும் மாதம் இது. தொட்டது துலங்கும் என்கின்ற வார்த்தையினை வெகுகாலமாக நான் தனுசு ராசிக்கு எழுதவில்லை என்பதை இங்கே நினைவு படுத்துகிறேன். யோகாதிபதி சூரியனும், ஐந்துக்குடைய செவ்வாயும் வலிமை பெறுவதால் தனுசின் முன்னேற்றங்கள் ஆரம்பிக்க இருக்கும் மாதம் இது.

இதுவரை நடந்த எதிர்மறை பலன்கள் யாவும் விலகிக் கொண்டிருப்பதை இனி நீங்கள் உணர முடியும். இனிமேல் தனுசு ராசிக்காரர்களுக்கு நன்மைகள் மட்டுமே நடக்கும். மூன்றில் குருபகவான் அமர்ந்து, ஏழாமிடத்தை பார்ப்பதால் உங்களில் சிலருக்கு சுப காரியங்கள் நடைபெற முன்னேற்பாடுகள் உண்டு. சிலர் திருமணம் நடக்கப் பெறுவீர்கள். அல்லது வாழ்க்கைத் துணையை அடையாளம் காணும் நிகழ்ச்சியாவது இந்தமாதம்  இருக்கும். சுக்கிரனும் சனியும் இரண்டாமிடத்தில்  ஒன்று கூடுவது தொழில் வேலை, வியாபாரம் போன்ற அமைப்புகளுக்கு நல்ல பலனை அளிக்கும். கேது வலுப்பெறுவதால் ஆன்மிகம் சம்பந்தமான பிரயாணங்கள் செய்வீர்கள். புனிதத்தலங்களை தரிசிக்கும் வாய்ப்பு கிடைக்கும். சிலருக்கு ஞானிகள் தரிசனம் கிடைக்கலாம். இதுவரை குலதெய்வ வழிபாடு செய்யாதவர்கள் மற்றும் நேர்த்திக்கடன் செலுத்தாதவர்கள் இந்தமாதம்  அவற்றை முடிப்பீர்கள்.

செவ்வாய் ஆட்சி வலுப் பெறுவதால் இதுவரை உங்களை சிக்கலுக்கு உள்ளாக்கி இருந்த அனைத்து விஷயங்களும் முடிவுக்கு வரத் துவங்கும். ராசிநாதனின் வலிமையால் எதையும் சமாளிப்பீர்கள். மனதில் தைரியம் வரும். இளைய பருவ தனுசு ராசிக்காரர்கள் ஏழரைச் சனியால் கடுமையான  கஷ்டங்களை அனுபவித்து விட்டீர்கள். இனி நீங்கள் கலங்கத் தேவையில்லை. சிறிது நல்லவை நடப்பது போல தோன்றியவுடன் அகலக்கால் வைக்க வேண்டாம். அவசரப்பட்டு தவறான முடிவுகளை எடுக்க வேண்டாம். கணவன், மனைவிக்குள் விட்டுக் கொடுத்து போவது நல்லது. வீண்வாக்குவாதங்களை தவிருங்கள். 2022-ம் வருடம் உங்கள் வருடமாக இருக்கும். எதிலும் ஜெயிப்பீர்கள். கவலை வேண்டாம்.

1,2,3,10,11,12,20,23 ஆகிய நாட்களில் பணம் வரும். 21-ம் தேதி அதிகாலை 3.47 முதல் 24-ம் தேதி அதிகாலை 2.41 வரை சந்திராஷ்டம நாட்கள் என்பதால் இந்த நாட்களில் எந்த ஒரு ஆரம்பங்களையும் செய்ய வேண்டாம். புதிதாக ஒருவரை அறிமுகப்படுத்தி கொள்வது போன்ற விஷயங்களை இந்த நாட்களில் தள்ளி வைக்கவும்.

அலுவலக நேரம்: 10:00 AM - 6:00 PM 

தொடர்பு எண்கள் செல்: +91 9768 99 8888, 8286 99 8888, 8870 99 8888, 8681 99 8888 +91 44 2435 8888, +91 44 4867 8888

குருஜி அவர்களின் கட்டுரை மற்றும் ராசிபலன்களை whatsapp ல் பெற  +91 8428 99 8888 என்ற எண்ணிற்கு தகவல் தரவும்.