சனி தரும் ஈஸ்வர நிலை.... C - 044

சென்ற வாரங்களில் சனிபகவான் நேர்வலு அடையும்போது தரும் முக்கியமான பலன்களைப் பார்த்த நிலையில் தற்போது சனிபகவான் சுபத்துவம் அடையும் போது தரும் ஆன்மிகம் உள்ளிட்ட சுபபலன்களைப் பார்க்கலாம்.

ஏற்கனவே ஒரே கிரகம் இருவேறு முரண்பட்ட நிலைகளைத் தன்னுடைய சுப அசுப நிலைகளின் மூலம் தரும் என்பதை உங்களுக்கு விளக்கியிருக்கிறேன்.

அதன்படி தன்னுடைய நேர்வலு மூலம் ஒரு மனிதனுக்கு தேவையற்றவைகளை மட்டுமே தர விதிக்கப்பட்டிருக்கும் சனிபகவான் சுபத்துவம் மற்றும் சூட்சுமவலுப் பெறும் நிலைகளில் தனது இயல்புநிலை மாறி அந்த ஜாதகருக்கு நன்மைகளைச் செய்வார்.

மேற்கண்ட இருநிலைகளில் சனிபகவானின் சுபத்துவப் படிநிலைகளை நீங்கள் தெளிவாகப் புரிந்து கொண்டால் ஒரு ஜாதகத்தில் சனி நன்மைகளைத் தருவாரா அல்லது தீயபலன்களைச் செய்வாரா என்பதை துல்லியமாகச் சொல்ல முடியும்.

சனிபகவானின் சுபத்துவப் படிநிலைகளை நான் பின்வருமாறு வரிசைப் படுத்துவேன்.

1. வலிமைபெற்ற குரு அவரைப் பார்ப்பது.

2. குருவுடன் இணைவது

3. குருவின் வீட்டில் இருப்பது

4. சுக்கிரன் அவரைப் பார்ப்பது

5. தனித்த புதன் அவரைப் பார்ப்பது

6. பூரண அல்லது வளர்பிறைச்சந்திரன் அவரைப் பார்ப்பது

7. சுக்கிரனுடன் இணைவது

8. புதனுடன் இணைவது

9. வளர்பிறைச் சந்திரனுடன் இணைவது

10. சுக்கிரன் மற்றும் புதனின் வீட்டில் இருப்பது

மேற்கண்ட அமைப்புகளில் சனிபகவான் திரிகோணங்களில் இல்லாமல் கேந்திர அமைப்புகளிலும் 3, 6, 11 போன்ற உபசய ஸ்தானங்களில் இருக்கும் போதும் உச்சபட்ச சுபத்துவம் அடைந்து அந்த ஜாதகருக்கு முதல்தர நன்மைகளைச் செய்வார்.

இதில் குருவின் வீட்டில் இருக்கும் சனிபகவானுக்கு மூன்றாவது நிலையைத் தந்து சுக்கிரனின் வீட்டில் இருக்கும் சனிக்கு பத்தாவது நிலையைத் தந்திருக்கிறீர்களே சுக்கிரனின் வீடான துலாத்தில்தானே சனி உச்சம் பெறுகிறார் என்ற சந்தேகம் உங்களுக்கு வருமானால் நீங்கள் இன்னும் சனியை சரியாகப் புரிந்து கொள்ளவில்லை என்றே அர்த்தம்.

உச்சத்தில் இருக்கும் சனி நேர்வலு மட்டுமே அடைவார். ஆனால் குருவின் வீட்டில் இருக்கும் சனி சுபவலு அடைவார் என்பதைப் புரிந்து கொள்வது நல்லது.

மேலும் சனி என்பவர் ஒரு சுப ஒளியற்ற கிரகம். எனவே மனிதனுக்குத் தேவையான நன்மைகளை அவர் செய்ய வேண்டும் என்றால் அவர் தன்னுடைய தீய ஒளிக்கதிர்களை இழந்து வடிகட்டப்பட்டு சுபக்கிரகங்களின் ஒளியைப் பெறவேண்டும்.

அந்த நிலையில் சனிக்கு ஒளிதரும் கிரகமும் வலுவான நிலையில் இருக்க வேண்டும். எனவேதான் இங்கே சந்திரனின் நிலையைக் குறிப்பிடும்போது பூரணச் சந்திரன் மற்றும் வளர்பிறைச்சந்திரன் என்று அடையாளப்படுத்திக் காட்டியிருக்கிறேன்.

சுபக்கிரகங்களில் குருவை விட சுக்கிரனே சனிக்கு நண்பர் என்றாலும் சுக்கிரன் சனியிடமிருந்து அதிக தூரத்தில் இருப்பதாலும் குருபகவான் சனிக்கு மிக அருகில் இருப்பதாலும் குருவின் தொடர்பே சனியைச் சுபராக்கும். அதிலும் குருவின் இணைவை விட பார்வையே அவரைப் புனிதப்படுத்தும்.

சுபத்துவத்தோடு சூட்சுமவலுவும் இணைகையில் சனிபகவான் முழுக்க முழுக்க ஒருவருக்கு நன்மைகளை மட்டுமே செய்யும் அதிகாரம் பெறுவார். பாபக்கிரகங்களின் சூட்சுமவலுவை ஏற்கனவே உங்களுக்கு நான் ஒரு தியரியாக சுருக்கமாக விளக்கியிருக்கும் நிலையில் டிகிரி வாயிலான சனியின் சூட்சும வலு நிலைகளை புத்தகமாக வெளியிட இருக்கிறேன்.

மேலும் இன்னொரு முரண்பட்ட நிலையாக சனியைப் புனிதப்படுத்தும் சுபக்கிரகம் சனியோடு இணைந்து அல்லது சமசப்தமமாக பார்க்கும் நிலைகளில் தான் அந்த ஜாதகருக்கு தனது சுபநிலைகளைத் தரும் தன்மைகளை இழக்கும் என்பதையும் நீங்கள் புரிந்து கொள்வது நல்லது.

இதுபோன்ற நிலையில் அந்த சுபக்கிரகத்தின் வலிமையிழப்பு என்பது சம்பந்தப்பட்ட லக்னத்திற்கு அந்த சுபக்கிரகம் எந்த ஆதிபத்தியத்திற்கு உட்பட்டது மற்றும் சுபக்கிரகம் எந்த வீட்டில் எந்த நிலையில் இருக்கிறது என்பதைப் பொறுத்தது.

அடுத்து சனி தரும் ஒரு உன்னதபலனான ஆன்மிக நிலையினை சென்ற வாரங்களில் விவரிக்கும்போது ஒரு மனிதனின் உன்னதநிலையான சித்து நிலைகளுக்கும் எளிதில் விடைகாண முடியாத ஞானத்தேடல்களான சென்ற பிறவியில் நான் என்னவாக இருந்தேன் இறந்தபின் எங்கு செல்வேன் போன்ற சிந்தனைகளுக்கும் சனிபகவான் காரணமானவர் என்பதைக் குறிப்பிட்டிருந்தேன்.

நமது புனிதநூல்கள் பிறக்கும்போதே ஐந்தறிவு படைத்த மிருகங்களை விட மேம்பட்டுப் பிறந்த பிறவியான ஆறறிவு கொண்ட மனிதன் தவம், தியானம் போன்ற அமைப்புகளினால் ஆறறிவுக்கும் மேலான ஏழாவது அறிவைப் பெறுவது இந்திரநிலை என்று குறிப்பிடுகின்றன.

இந்த ஏழாவது அறிவான இந்திரநிலையை விடவும் முன்னேறி எட்டாவது அறிவை ஒருவர் பெறும்போது அவர் அஷ்டமாசித்திகளைப் பெற்று அனைத்தையும் உணர்ந்த சித்தராகிறார். இந்த சித்துநிலையை எட்டும்போது ஒருவரால் முக்காலத்தையும் அறிய முடியும்.

மேற்சொன்ன எட்டாவது அறிவையும் பெற்று சித்தனாகும் ஒருவர் மேலும் முன்னேறி ஆன்மிக உச்சநிலையான ஒன்பதாவது அறிவை எட்டும் போது ஈஸ்வரநிலை பெற்று பரம்பொருளுடன் இரண்டறக் கலந்து இறைநிலை எய்துகிறார்.

இந்த ஈஸ்வரநிலையையே ஆன்மிகத்தில் மிக உயர்ந்த ஒரு இறுதி நிலையாக நமது புனிதநூல்கள் குறிப்பிடுகின்றன.

இந்த ஒன்பதாவது அறிவுக்கு ஒரு மனிதனை உயர்த்தும் நிலையினை லக்னம் அல்லது ராசிக்கு வலிமையான குருவின் பார்வை அல்லது தொடர்பினைப் பெற்ற ஒரு ஜாதகத்தில் இன்னொரு ஆன்மிகக் கிரகமான கேதுவின் சுபத்துவ இணைவைப் பெற்று அமைந்த சனி நான் மேலே சொன்ன அதிகபட்ச சுபத்துவ நிலைகளில் இருக்கும்போது செய்வார்.

இந்த ஆன்மீக நிலையினில் மறைந்திருக்கும் இன்னொரு சூட்சுமம் என்னவெனில் தனித்து சனியினால் ஆன்மிக உன்னதநிலையினை ஒருபோதும் தரமுடியாது. லக்னத்திற்கோ ராசிக்கோ ஆன்மிக முதன்மைக்கிரகமான குருவின் தொடர்பு இருக்கும்போது மட்டுமே ஒருவரை சனியால் ஆன்மிகத்தில் ஈடுபடுத்த முடியும்.

அதுவன்றி குரு மற்றும் கேதுவின் தொடர்பற்ற சனியால் ஒருவரை ஆன்மிக நிலைகளில் உச்சநிலைக்குக் கொண்டு செல்லவே முடியாது. சனி ஒரு சுய ஒளியற்ற பாபக்கிரகம் என்பதால் எந்த ஒரு சூழலிலும் அவரால் தனித்து இயங்கவே முடியாது.

அடுத்து சனி அவயோகம் தரும் லக்னமான கடக லக்னத்திற்கு அவர் அஷ்டமாதிபதி எனும் எட்டுக்குடைய கொடிய பாவி என்ற நிலையையும் மனைவி நண்பர்கள் பங்குதாரர்களைக் குறிக்கும் ஏழாமிடத்திற்கும் அதிபதியாவர்.

கடகத்திற்கும் சிம்மத்திற்கும் சனிபகவான் ஆட்சி மற்றும் மூலத்திரிகோண நிலைகளை மகர கும்ப வீடுகளில் பெற்று வலிமையாக ஏழாமிடத்தில் அமரும்போது தனது கொடிய பார்வையால் ஒரு ஜாதகத்தின் உயிர் ஸ்தானங்களான அந்த ஜாதகனைக் குறிக்கும் தான் எனப்படும் லக்னம் மற்றும் தான் வந்த வழியான தாய் தந்தை ஸ்தானங்களாகிய நான்கு ஒன்பதாமிடங்களைப் பார்த்துக் கெடுப்பார்.

இந்த நிலையால்தான் சிம்ம நாயகனான சூரியனுக்கும் கடகநாதன் சந்திரனுக்கும் சனிபகவான் ஜென்மப் பகைவர் என்ற நிலை பெறுகிறார்.

கடகத்திற்கும் சிம்மத்திற்கும் சனிபகவான் நன்மைகளைச் செய்யவேண்டும் என்றால் அவருடைய கொடியபார்வை எனப்படும் கண்களும் கைகளும் கட்டப்பட்டிருக்க வேண்டும். மிகவும் சிக்கலான ஒரு சுபத்துவ சூட்சும நிலைகளில் மட்டுமே அவர் கடக சிம்ம லக்னங்களுக்கு நன்மை செய்வார்.

முதலில் கடக லக்னத்திற்கு சனி தரும் நிலைகளைப் பார்ப்போமானால் உபசய ஸ்தானங்களான மூன்று ஆறு பதினொன்றாமிடங்களில் இருந்தால் அதாவது தனது நண்பர்களான புதன் சுக்கிரனின் வீடுகளிலும் தன்னைப் புனிதப்படுத்தும் குருவின் வீடுகளிலும் சுபத்துவ சூட்சும நிலைகளில் இருக்கும்போது பெரும் நன்மைகளைச் செய்வார்.

இந்த உபசயஅமைப்பு அவயோகக்கிரகங்களுக்கு நமது மூலநூல்களில் வலியுறுத்திச் சொல்லப்படும் சூட்சுமம் என்னவெனில் ஒரு ஜாதகத்திற்கு மேற்கண்ட மூன்று பதினொன்றாமிடங்களில் மட்டுமே சனிபகவான் நட்பு நிலைகளில் இருப்பதோடு முழுக்க முழுக்க இவ்விடங்களில் கடகத்தின் லக்னாதிபதி சந்திரன் தனாதிபதி சூரியன் ராஜயோகாதிபதி செவ்வாயின் சாரங்களில் இருப்பதால்தான். .

இன்னுமொரு உபசயஸ்தானமான ஆறாமிடத்தில் கடைசிப்பாதமான தனாதிபதி சூரியனின் உத்திராடம் ஒன்றாம் பாதத்தில் மறைந்து வர்கோத்தமம் பெறும் நிலையில் சனியால் நன்மைகள் இருக்கும்.

அதேபோல மீதமுள்ள உபசயஸ்தானமும் கேந்திரமுமான பத்தாமிடத்தில் நீசம் பெறுவதும் கடகத்திற்கு நன்மைகளைத் தரும் நிலைதான். ஆனால் இங்கும் அவர் தனாதிபதியான சூரியனின் கிருத்திகை ஒன்றாம் பாதத்தில் அமர்ந்து நவாம்சத்தில் மகரத்தில் ஆட்சி பெறுவது வெகு சிறப்பு.

ஆனால் இங்கே அவர் நீசவக்கிரம் பெற்று உச்ச வலிமை பெறுவதோ சூரியன் அல்லது செவ்வாயுடன் இணைந்து நீசபங்கம் அடைவது நன்மைகளைக் குறைக்கும்.

அடுத்து கடக லக்னத்திற்கு லக்னத்தில் சனிபகவான் இருப்பது சரியான அமைப்பு அல்ல. இந்நிலையால் ஜாதகர் யார் சொல்லையும் கேட்காத பிடிவாதக்காரராகவும் தனக்கென ஒரு கொள்கை கொண்டவராகவும் ஊரோடு ஒத்துப் போகாதவராகவும் சுயநலக்காரராகவும் இருப்பார். லக்னத்தில் அவர் சுபத்துவம் அடையும் நிலைகளில் மட்டுமே இந்த குணங்கள் வெளித்தெரியாத நிலையும் ஆன்மிக ஈடுபாடும் இருக்கும்.

இரண்டாம் வீடான சிம்மத்தில் இருப்பது ஜாதகரின் பொருளாதார நிலையையும் அவரது குடும்பத்தையும் சனிதசையில் பாதிக்கும். ஆனால் இங்கிருந்து சனி தனது எட்டாம் வீட்டைப் பார்ப்பார் என்பதால் ஜாதகர் நீடித்த ஆயுள் உடையவராக இருப்பார்.

நான்காமிடத்தில் அவர் உச்சநிலை பெறுவதும் கடகத்திற்கு நன்மைகளைச் செய்யாது. . இங்கே உச்சம் பெறும் சனி வக்ரம் பெறுவதும் சுப சூட்சுமவலு அடைவதும் மட்டுமே நன்மைகளைச் செய்யும். ஐந்தாமிடத்தில் அமர்ந்தால் அதிர்ஷ்டத்தையும் பூர்வபுண்ணிய பலத்தையும் குழந்தை பாக்கியத்தையும் பாதிப்பார்.

ஏழாமிடத்தில் அமரும் நிலையில் சுபத்துவம் அடைந்தால் மட்டுமே நல்ல மணவாழ்வு இருக்கும். இல்லையெனில் தாமததிருமணம் திருமணமே ஆகாத நிலை திருமணத்திற்குப் பிறகும் நிம்மதியற்ற மணவாழ்வு ஆகியவற்றைத் தருவார்.

எட்டாமிடத்தில் சுபத்துவம் பெற்றால் ஜாதகரை வெளிமாநிலம் வெளிநாட்டிற்கு அனுப்பி சம்பாதிக்க வைப்பார். ஆயினும் அங்கும் சிக்கல்களையே செய்வார். எட்டாமிடசனியால் தீர்க்காயுள் உண்டு. ஒன்பதாமிடத்தில் அமர்ந்தால் தந்தையைக் கெடுப்பார். இளம் வயதிலேயே தந்தை மரணம் அல்லது தந்தை இருந்தும் இல்லாத நிலை. தகப்பனுக்கும் மகனுக்கும் ஆகாத நிலை ஆகியவற்றை உண்டு பண்ணுவார்.

விரயஸ்தானமான பனிரெண்டாம் வீடு அவருக்கு நட்புக்கிரகமான புதனின் வீடு என்பதால் இங்கு அமரும் சனி பெரிய கெடுதல்களைச் செய்யமாட்டார். இங்கிருக்கும் சனி தூர இடங்களுக்குச் செல்லும் நிலையையும் வெளிமாநில வெளிநாட்டுத் தொடர்பையும் ஏற்படுத்துவார்.

அடுத்த லக்னங்களுக்கான பலன்களை வரும் வியாழன் பார்க்கலாம்.


( டிச 18 - 2015 மாலைமலர் நாளிதழில் வெளிவந்தது.)