குருஜியின் வார ராசி பலன்கள் (04.03.2024 –10.03.2024)

 

ஜோதிடக்கலை அரசு ஆதித்யகுருஜி

கைப்பேசி : 8681 99 8888

மேஷம்:

ராசிநாதன் செவ்வாய்  உச்ச நிலையில் உள்ளதோடு, 11 ல் சனியும் இருப்பதால், இது மேஷ ராசிக்காரர்களின் மனம் போல் அனைத்தும் நடக்கும் வாரமாக இருக்கும். முடிக்க முடியாமல் இருந்த விஷயங்களை வெற்றிகரமாக முடித்துக் காட்டுவீர்கள். சிலருக்கு எதிர்கால முன்னேற்றங்களுக்கான ஆரம்பங்களும், அறிமுகங்களும் இருக்கும். நட்புக்கிரகங்கள் யோக அமைப்பில் இருப்பதால் சாதகமான வாரம் இது. கருத்து வேறுபாடு, குடும்ப பிரச்னைகள் அல்லது வேலை விஷயமாக பிரிந்து இருந்த தம்பதியினர் ஒன்று சேர்வார்கள். தொழில்ரீதியான பயணங்கள் இருக்கும்.

ஐந்தாமிடத்தை சூரியன் பார்ப்பதால் தூர இடங்களில் இருக்கக்கூடிய குழந்தைகளிடம் இருந்து நல்ல தகவல்கள் வரும். பிள்ளைகளால் சிலருக்கு உதவிகள் இருக்கும். சிலருக்கு இதுவரை இருந்து வந்த தன்னம்பிக்கை இல்லாத நிலை விலகும். எல்லாவற்றிலும் விடாமுயற்சியுடன் இறங்கி சாதித்து காட்டுவீர்கள். எடுத்துக் கொண்ட காரியங்களை நல்லவிதமாக முடித்து பெயர் எடுப்பீர்கள். தந்தைவழி உறவினர்கள் உதவுவார்கள். அப்பாவின் அன்பு கிடைக்கும். பணவரவு உண்டு.

ரிஷபம்:

ஜீவனாதிபதி சனி ராசிநாதன் சுக்கிர சேர்க்கையால் சுபத்துவ வலுப்பெறுவதால் ரிஷப ராசிக்காரர்களுக்கு தடைகள் விலகும் வாரம் இது. புதன், ராகு சேர்க்கையால் பணிபுரியும் இடங்களில் உங்களுக்கு கெட்ட பெயர் ஏற்படுத்த சிலர் முயற்சிப்பார்கள். எதிரிகள் கை ஓங்கும். ஆயினும் எல்லாம் பரம்பொருளின் கருணையால் நன்மையாகவே முடியும். பணவரவு சுமாராகத்தான் இருக்கும். செலவுகளை யோசித்து கலக்கம் அடைவீர்கள். செலவிற்கு ஈடான வருமானம் அடுத்த வாரம் முதல் வரத் துவங்கும் என்பதால் இந்த மனக்கலக்கம் தற்காலிகமானதுதான். கவலை வேண்டாம்.

மேலதிகாரிகளால் சங்கடங்கள் உண்டு. அதிகாரி சொல்வதை கேட்டு நடப்பது நல்லது. வியாபாரிகளுக்கு போட்டிகள் இருக்கும். வியாபாரம் குறையும் என்றாலும் லாபம் குறையாது. வருமானத்தை விட அதிக செலவு இருக்கும். எதிலும் சிக்கனமாக இருங்கள். அனைத்திலும் பெரியவர்களின் ஆலோசனை கேட்பது நல்லது. 7, 8 ஆகிய நாட்களில் பணம் வரும். 4-ம்தேதி மாலை 4.21 முதல் 6-ம் தேதி இரவு 8.28 வரை சந்திராஷ்டம நாட்கள் என்பதால் மேற்கொண்ட தினங்களில் நீண்ட தூர பிரயாணங்களை தவிர்ப்பது நல்லது.

மிதுனம்:

ராசிநாதன் புதன், நீச்ச நிலையில், தொழில் ஸ்தானமான பத்தாம் இடத்தில், ராகுவுடன் இணைந்துள்ளதால் இந்த வாரம் மிதுன ராசிக்கு தொழில், வேலை, வியாபாரம் போன்ற ஜீவன அமைப்புகளில் சிக்கல்களும், குறைகளும் இருக்கும். பணவரவில் சுணக்கம் இருக்கலாம். எதிர்பார்ப்புகள் இழுபறியாக இருக்கும் என்பதால் எதிலும் கவனமுடன் இருப்பது நல்லது. மனதில் குழப்பங்களும் முடிவெடுக்க முடியாத தடுமாற்றங்களும் இருக்கும். போட்டி பந்தயங்களில் கலந்து கொள்ள வேண்டாம். எவருக்கும் எதுவும் செய்து தருவதாக வாக்குக் கொடுத்தால் நிறைவேற்றுவது கடினம்.

சகோதரர்களுடன் அனுசரித்துப் போவது நல்லது. இரும்பு ஆயுதங்களை கையில் வைத்து பணிபுரியும் டெய்லர் போன்ற துறையினருக்கு இந்தவாரம் லாபங்கள் உண்டு. யாரையும் நம்ப வேண்டாம். சுக்கிரன், சனி வலுவாக இருப்பதால் தாமதித்து வந்த வேலை இப்போது கிடைக்கும். வேலை பற்றிய நல்ல தகவல்கள் வந்து சேரும். 4, 5 ஆகிய தினங்களில் பணம் வரும். 6-ம்தேதி இரவு 8.28 மணி முதல் 8-ம் தேதி இரவு 9.20 மணி வரை சந்திராஷ்டம தினங்கள் என்பதால் இந்த நாட்களில் அலைச்சல் தரும் வேலைகளைச் செய்ய வேண்டாம்.

கடகம்:

வார முதல் நாட்களில் ராசிநாதன் சந்திரன் நீச்சமாகி, வாரத்தின் கடைசி நாட்கள் சந்திராஷ்டம நாட்களாக இருப்பதால் எதிலும் விட்டேத்தியான மனப்பான்மை, சோம்பலுடன் இருப்பீர்கள். சுறுசுறுப்பை வளர்த்து கொள்ள வேண்டிய வாரம் இது. எதிலும் முடிவு எடுக்க முடியாமல் தடுமாறுவீர்கள், இதைச் செய்யலாமா? அதைச் செய்யலாமா? என்று நீங்கள் அலைபாயும் வாரம் இது. இன்னும் சில வாரங்களில் குரு  லாப ஸ்தானத்திற்கு மாறப் போவதால் உதவி செய்ய மறுத்தவர்கள் இனி தேடி வந்து உதவி செய்வார்கள்.

தந்தை வழியில் நன்மைகளும், அம்மாவின் ஆசிர்வாதங்களும் கிடைக்கும். சிலருக்கு தாய்வழி சீதனம் போன்று ஏதேனும் சொத்துக்கள் கிடைக்கும்.  சிலர்  புதிய வாகனம் வாங்குவீர்கள். தாய் வழி உறவினர்களால் சங்கடங்கள் உண்டு 5, 6 ஆகிய நாட்களில் பணம் வரும். 8-ம் தேதி இரவு 9.20 மணி முதல் 10-ம் தேதி இரவு 8.40 வரை சந்திராஷ்டமம் என்பதால் புதிய முயற்சிகள் எதையும் ஆரம்பிக்க வேண்டாம். இந்த தினங்களில் அறிமுகமாகும் ஒருவரின் மூலம் பின் நாட்களில் சிக்கல்கள் வரும் என்பதால் கவனமாக இருப்பது நல்லது.  

சிம்மம்:

2, 11 க்குடைய புதன் எட்டில் மறைந்து, ராகுவுடன் இணைந்து, ராசியும் சனியின் பார்வை பெறுவதால்  இந்த வாரம் சிலருக்கு தேவையற்ற வழியில் வீண் செலவு இருக்கும். பிள்ளைகள் ஏதாவது வம்பு இழுத்துக் கொண்டு வரலாம் என்பதால் குழந்தைகளின் மேல் அக்கறை வையுங்கள். அவர்களுக்கு ஏதாவது பிரச்சினைகள் இருக்கிறதா என்பதை கேட்டு தெரிந்துக் கொள்ளுங்கள். சுக்கிரன் வலுவாக இருப்பதால் கலைஞர்களுக்கு இனிமேல் நல்ல பலன்கள் உண்டு. வேலை செய்யும் இடத்தில் பிரச்னைகள் எதுவும் இருக்காது. நிம்மதி இருக்கும்.

வியாபாரத்தில் இலாபம் உண்டு. சிலருக்கு சொல்லிக் கொள்ளும்படியான பணவரவு கிடைக்கும். கஷ்டங்கள் தீரும். மறைமுக இலாபங்கள் மற்றும் வருமானங்கள் இருக்கும். இளைய பருவத்தினருக்கு இந்த வாரம் காதல் வரும். சிலர் ரகசியமான காரியங்களை செய்வீர்கள். அவற்றில் வெற்றியும் பெறுவீர்கள். தூர இடங்களில் இருந்து நல்லசெய்திகள் கிடைக்கும். தந்தையின் ஆதரவும் ஆசிகளும் உண்டு. இன்சூரன்ஸ், மார்க்கெட்டிங், போன்ற துறையில் இருப்பவர்களுக்கு இது நல்ல வாரமாக அமையும்.

கன்னி:

ராசிநாதன் புதன் நீச்ச நிலையோடு ராகு உடன் இணைந்து இருந்தாலும், நண்பர்கள் சனியும், சுக்கிரனும் இணைந்து ஆறாமிடம் நல்ல அமைப்பில் இருப்பதால் சோதனைகள் வந்தாலும் அதை உங்களுடைய சாதுர்யமான பேச்சாலும், அடுத்தவரை நோகடிக்காத பண்பாலும் விரட்டி விடுவீர்கள். எட்டில் குரு சுப வலுப் பெறுவதால் வீண் செலவுகள் தற்போது இருக்கும். ஒரு குறிப்பிட்ட பலனாக ராசியில் கேது இருப்பதால் எவரையும் நம்பி ஜாமீன் போடுவதோ, யாருக்கும் வாக்கு கொடுப்பதோ கூடாது. போட்டி பந்தயங்கள், லாட்டரி சீட்டு, ரேஸ் போன்றவை கை கொடுக்காது.

சிலருக்கு சூதாட்டம், பங்குச் சந்தை, லாட்டரி போன்றவைகளில் திடீர் ஆர்வம் வரும். அதனால் நஷ்டங்கள் இருக்கும் என்பதால் எப்படிப்பட்ட சூழ்நிலையிலும் தற்போது ஸ்பெகுலேஷன் துறைகளில் ஈடுபட வேண்டாம். பணத்தையும் முதலீடு செய்ய வேண்டாம். பணம் கொடுத்தால் வேலை வாங்கித் தருகிறேன், ஒரு ரூபாய் போட்டால் பத்து ரூபாய் எடுத்து விடலாம் போன்ற மோசடிப் பேர்வழிகளிடம் ஜாக்கிரதையாக இருங்கள். ஒருவருக்கு உதவி செய்ய நினைத்தாலும் சிக்கல்கள் வரும் வாரம் இது.

துலாம்:

ராசிநாதன் சுக்கிரன் நட்பு வீட்டில், ராசி குருவின் பார்வையுடன் இருக்கும் யோக வாரம் இது. எதிர்கால வாழ்க்கைக்கு உதவும் நபர்களை இப்போது சந்திப்பீர்கள்.. வியாபாரிகளுக்கு சிக்கல்கள் எதுவும் இல்லை. பங்குச்சந்தை, சூதாட்டம் போன்றவைகளில் லாபங்கள் கிடைக்கும். வழக்குரைஞர்கள் சிலர் தங்களின் தனிச்சிறப்பான வாதத்தால் பிறரால் கவனிக்கப் பெறுவார்கள். வழக்குகள் சாதமாக திரும்பும். சிலருக்கு வீட்டுக்கனவு நனவாகும். சிலருக்கு வெளிமாநிலம் அல்லது வெளிதேச பிரயாணம் இருக்கும்.

வேலையின் காரணமாக பிரிந்திருந்த கணவன் மனைவியர் ஒரே இடத்திற்கு மாற்றலாவார்கள். அதிக பணம் புரளும் இடங்களில் பணி புரிபவர்கள், வங்கித் துறையினர் அலுவலகங்களில் மதிப்பு, மரியாதைகளை பெறுவார்கள். இரண்டாம்  அதிபதி செவ்வாய் உச்சமாகி, ஐந்தில் புதன் ராகுவுடன் இருப்பதால் எதிர்பாராத லாபங்கள் உண்டு. வெளிநாடு சம்மந்தப்பட்ட மல்டிநேஷனல் கம்பெனிகளில் வேலை செய்பவர்களுக்கு சிறப்புகள் சேரும். பெண்களால் இந்த வாரம் செலவுகள் இருக்கும். மனைவிக்கு ஏதேனும் வாங்கி கொடுப்பீர்கள்.

விருச்சிகம்:

விருச்சிகத்திற்கு தொட்டது துலங்கும் யோக வாரம் இது. ஜமாயுங்கள். எதையும் சாதிக்கலாம். ஆறாமிடத்தில் இருக்கும் குருவால் தொழிலிலும், சொந்த வாழ்க்கையிலும் உள்ள  எதிரிகளையும், எதிர்ப்புகளையும் ஜெயிக்க முடியும். கடன்தொல்லைகள் கட்டுக்குள் இருக்கும். இதுவரை பயமுறுத்திக் கொண்டிருந்த கடன்காரர்கள் உங்கள் மேல் நம்பிக்கை வைப்பார்கள். வாடகை கொடுக்க முடியும். பாதிக்கப்பட்ட அனைத்திலிருந்தும்  மீண்டு வருவீர்கள். தொழில், வியாபாரம் நன்றாக நடக்கும்.

மஞ்சள் நிற பொருட்களால் லாபம் அடைவீர்கள். உங்களில் சிலர் பிடிவாத குணத்தால் சில நல்ல வாய்ப்புகளை இழப்பீர்கள். கலைஞர்களுக்கு மீண்டும் பணி கிடைக்கும். அரசு தனியார்துறை ஊழியர்களுக்கு இனி பிரச்னைகள் எதுவும் இருக்காது. குறிப்பிட்ட சிலருக்கு வேலை மாற்றம் நல்லது பணி இடமாற்றம் இருக்கும். உங்களில் சிலருக்கு பெண்களால் லாபங்கள் உண்டு. சொன்ன வேலையை சிறப்பாக செய்து முடிப்பீர்கள். இதுவரை பாராட்டாதவர்கள் இப்போது உங்களின் தனித்திறமையை உணரும்படி நடந்து கொள்வீர்கள்.

தனுசு:

ராசிநாதன் குரு, ராசியைப் பார்ப்பதாலும், செவ்வாய் உச்ச நிலையில் உள்ளதால், தனுசு ராசிக்கு அனைத்திலும் மாற்றங்களும், ஏற்றங்களும் இருக்கும். முப்பது வயதுகளில் இருக்கும் இளைஞர்கள் தன்னம்பிக்கையுடன் எதையும் சாதிப்பீர்கள். பெண்களுக்கு மிகவும் நன்மை தரும் வாரம் இது. எதிர்காலத்தில் நீங்கள் வளமான வாழ்க்கை வாழக்கூடிய அமைப்புக்கு அஸ்திவாரம் இப்போது அமையும். புதிய அறிமுகங்கள் உண்டு. அதனால் நன்மைகளும் இருக்கும். மிக முக்கிய பலனாக இந்த வாரம் குருட்டு அதிர்ஷ்டத்தின் மூலம் ஒரு நல்லது நடக்கும்.

ராசிநாதனுக்கு வீடுகொடுத்த. செவ்வாய், தன வீட்டில் உச்சமாக இருப்பதால் இனிமேல் வராது என்று கைவிட்ட ஒரு தொகையோ அல்லது இனி நடக்காது என்று மறந்து  விட்ட ஒரு விஷயமோ இந்தவாரம் சாதகமாக நடந்து, கிடைத்து உங்களை இன்ப அதிர்ச்சிக்கு உள்ளாக்கும். தொழில் அமைப்புகளில் மந்தநிலை நீங்கி அதிகமுயற்சி இன்றியே லாபங்களும், நன்மைகளும் நடக்கும். வீடு வாங்க வேண்டும் என்று நினைத்திருந்தவர்களுக்கு கடன் பெற்று வீடு வாங்க எல்லா அமைப்புகளும் கூடி வந்து விட்டது.

மகரம்:

இரண்டில் சுக்கிரன் மற்றும் மூன்றாமிடத்தில் உள்ள ராகுவால் இந்த வாரம் உங்களால் எதையும் சாதித்துக் காட்ட முடியும். அன்னிய இன, மத, மொழிக்காரர்கள் சரியான நேரத்தில் நல்ல உதவிகளை செய்வார்கள். குறிப்பாக இஸ்லாமிய நண்பர்களால் நன்மைகள் இருக்கும். சிலருக்கு இட மாறுதல்கள்  இருக்கும். கணவன் மனைவி உறவில் விட்டுக் கொடுத்து சாதிப்பீர்கள். எப்படி இருக்கிறார்களோ என்று பயந்து கொண்டிருந்த நிலையில் வெளிநாட்டில் இருக்கும் மகன், மகளிடமிருந்து நல்ல செய்தி வரும்.

வாழ்க்கைத் துணைவர் மூலம் சந்தோஷங்கள் உண்டு. அலுவலகங்களில் சுமுகமான சூழ்நிலை இருக்கும். மற்றவர்களால் மதிக்கப்படுவீர்கள். மேல் அதிகாரியின் தொந்தரவு இருக்காது. உங்களில் சிலர் இன்னும் சில காலம் வீட்டிலேயே இருந்து வேலை செய்ய வேண்டியிருக்கும். பங்குச் சந்தையில் முதலீடு செய்பவர்கள் எச்சரிக்கையுடன் இருக்கவும்.உங்களில் முதல் திருமணம் தோல்வி அடைந்து வேதனையில் இருப்பவர்களுக்கு இந்த வாரம் எதிர்கால நல்வாழ்விற்கான அடித்தளங்கள் அமையும்.

கும்பம்:

உங்களில் வேதனைகளையும் அவுமானங்களையும் மட்டும் சந்தித்துக் கொண்டிருக்கும்  கும்ப ராசி குறிப்பாக சதயம் நட்சத்திர இளைய வயதினர் இனிமேல் முன்னேற்றத்தை காண்பீர்கள். ஏழரைச் சனியால் அவதிப்படும் உங்களுக்கு இந்த வாரம் முதல் யோகாதிபதி சுக்கிரன் ராசியில் இருக்கும் நிலை பெறுவதால் தொழில், வியாபாரம், வேலை முதலிய ஜீவன அமைப்புகளில் ஆறுதலான வகையில் நல்ல பலன்கள் நடக்கும். சிரமங்கள் குறையும். திருமணம் ஆகாதவருக்கு இப்போது உறுதி ஆகும். நல்ல பலன்கள் நடைபெறும் வாரம் இது.

கடன் தொல்லைகளில் சிக்கி நிம்மதியை இழந்தவர்களுக்கு அதில் இருந்து விடுபடுவதற்கான வழிகள் தோன்றவும், செயல்படவும் ஆரம்பிக்கும். வேலையில் இருப்பவருக்கு பதவி உயர்வு, ஊதிய உயர்வு, நீண்டநாள் நிலுவையில் இருக்கும் தொகைகள் கிடைத்தல் போன்ற பலன்கள் நடைபெறும். கணவன் மனைவி உறவு சிறப்பாக இருக்கும். பிள்ளைகள் சந்தோஷத்தை தருவார்கள். விரும்பிய விஷயங்கள் நடக்கும். கும்ப ராசிக்கு இது பயனுள்ள வாரமாகவே இருக்கும் என்பதில் எவ்வித சந்தேகமும் இல்லை.

மீனம்:

மீனத்திற்கு இது மகிழ்ச்சிகள் உள்ள வாரமாக இருக்கும். ஒன்பதுக்குடைய செவ்வாய் உச்சம், 10 க்குடைய குரு அந்த வீட்டிற்கு பார்வை, என தர்ம கர்மாதிபதி யோக நிலை இருப்பதால் நல்ல வேலைக்கு முயற்சி செய்தவர்களுக்கு இப்போது வேலை அமையும். சிலருக்கு அரசு வேலை யோகம் உண்டு. கலைத்துறையினருக்கு வாய்ப்புகள் கிடைக்கும். உடல்நலம் சரி இல்லாதவர்கள் ஆரோக்கியம் மேம்படுவார்கள். உச்ச செவ்வாயின் இரண்டாம் வீட்டுப் பார்வையால் எதற்கெடுத்தாலும் கோபம் வருவதற்கு வாய்ப்பு இருப்பதால் கோபத்தைக் கட்டுப்படுத்துங்கள்.

என்ன பிரச்னை என்றாலும் குரு வலுவாக இருப்பதால் பணவரவு இருக்கும். சுக்கிரனோடு  உள்ள சனியால் மூத்த சகோதரர்கள் உதவி உண்டு. சிலருக்கு சொத்து சம்பந்தப்பட்ட ஒரு பிரச்னை முடித்து வைக்கப்படும். வெளிநாட்டில் இருக்கும் மீன ராசிக்காரர்களுக்கு நல்ல மாற்றங்கள் நடக்கும். எதிர்காலத்தை நிர்ணயிக்க கூடிய சில விஷயங்களை இப்போது செய்வீர்கள். ஒரு சிலருக்கு வீடு அல்லது வாகனம் புதியதாகவோ ஏற்கனவே உள்ளதை மாற்றியோ அமையும்.

அலுவலக நேரம்: 10:00 AM - 6:00 PM 

தொடர்பு எண்கள். செல்.8681 99 8888, 8870 99 8888, 8428 99 8888, 7092 77 8888, 044-24358888, 044-48678888.

குருஜி அவர்களின் கட்டுரை மற்றும் ராசி பலன்களை வாட்ஸ் அப்பில் பெற குருஜியின் whatsapp சேனல் அஸ்ட்ரோ குருஜியை கீழ்காணும் லிங்கில் சப்ஸ்கிரைப் செய்து கொள்ளவும்...

https://whatsapp.com/channel/0029Va5e3OR0rGiLgmkhJ537